В Новім Саді одпрезентовали нову книжку Іріны Гарді Ковачевіч

У віторок 27-го октобра 2026-го року одбыла ся в просторах Інштітуту про културу войводиньскых Русинів в Новім Саді презентація новой книжкы Іріны Гарді Ковачевіч під назвов Руски идиоми, фрази и вирази (Русиньскы ідіомы, фразы і выразы). Інформовала о тім аґентура Рутенпрес.

На презентації авторка бісідовала, же зберати ідіомы, фразеолоґізмы і выразы в русиньскім языку почала цалком спонтанно, бо збачіла, же молодшы, але і старшы Русины часто замінюють слова із русиньской бісіды, найчастіше в їх припаді із сербскыма словами, але так само із анґліцькыма. Чула, же треба штось із тым робити, жебы тоты процесы спомалили ся.

Рецензентков выданя є Гелена Медєші, котра прочітала на презентації рецензію. Присутных на промоції привітала директорка Інштітуту про културу войводиньскых Русинів Рената Вуясиновіч, і одповідна редакторка книгы Руски идиоми, фрази и вирази Єлена Перковіч бісідовала о процесі выдаваня книгы, од першой ідеї аж до завершіня.

Книгу выдали Новинарьска асоціація Русинів і Завод за културу войводиньскых Русинів.

Іріна Гарді-Ковачевіч до літературы вступила як поетка і шырша публіка єй знать головно через поезію. Першу збірку выдала у 1969-ім році під назвов На дланї заренко. Робила і в журналістіці, так русиньскій як і сербскій. У 2016-ім році здобыла Премію Мірослава Стрібера за приповідкову книжку Нєбо над Керестуром. Книжку леґенд і приповідок выдало выдавництво Руске слово, а вышла і як авдіокнижка.

Общество писателів Войводины їй у 2023-ім році уділило Нагороду за ціложывотне діло, за літературный опус.

Фото: Рутенпрес.