Сумар дня на 6. мая 2025 р.

Приносиме вам сумар медияльной ґрупы ЛЕМ.фм+ на ден 6. мая 2025 р.

STVR глядать русиньскых протаґоністів до документарного філму

Словацка Телевізия і Радийо (STVR) рыхтує документальный фільм «Будуєме Словацию». З той причыны глядат протаґоністів русиньского походжыня, котры можут поділити ся істориями еміґрациі до ЗША на переломі XIX і XX в., припадно за I Чехословацкой Республикы. Фільм буде ся зосереджал на тзв. «американьскых хыжах» – будуваных еміґрантами по повроті до рідного краю. То унікатове явиско мало великє влияня на модернізацию словацкых сел. На жаль, тому феноменови грозит днес заникнутя. Властителі такых хыж часто не мают свідомости історичной вартости будинків, зато розпадают ся они або сут неодповідньо перерабляны. Творці фільму хотят вказати не лем жытя еміґрантів по повороті, але тіж саму еміґрацию і єй влияня на розвиток сел. Додатково, заохочают до контакту тых, котры мают інформациі о плянуваній перебудові, реновациі або буріню такых хыж. Заінтересуваны можут контактувати ся через інтернетову почту або телефонічні. Більше дрібниц найдете в статі на нашым сайті.

«Шляком забытых культур» новый проєкт Ґмінного Осередка Культуры в Лабовій

Ґмінный Осередок Культуры в Лабовій зачынат реализацию проєкту «Шляком забытых культур». В його рамках сут прелекциі направлены на учеників кляс 1-3 і4-8 основных шків находячых ся в ґміні Лабова. Цілю стріч єст приближыти молодому поколіню богату історию реґіону, в котрым істнували ріжны культуры і реліґіі. Додатково, в вакацийным періоді пройдут варштаты творіня кривульок та рыхтуваня жыдівскых вытинанок. Головным пунктом проєкту буде фотоґрафічна выстава презентуюча культурову спадковину Поляків, Жыдів і Лемків, котры перед ІІ світовом войном прожывали в ґміні Лабова. Проєкт отримал дофінансуваня з проґраму ЕтноПольща орґанізуваного Нацийональным Центром Культуры.

Никыфор в Катовицях

В Катовицях мож видіти выставу непрофесийных артистів пн. «Талант, пасия і інтуіция». Презентуваны творы то працы авторства м.ін. креницкого Никыфора, Едмунда Монсєля і Ервіны Сувкі. Выстава складат ся з понад 200 прац артистів з Польщы, Чех, Франциі, Украіны і Сербіі, а презентуваны роботы то не лем образы, але тіж різбы, ґрафікы і інчы артистичны формы. Выстава «Талант, пасия і інтуіция» то нова одслона выставы проф. Александра Яцковского, бадача непрофесийной штукы. Одновлена версия выставы єст презентувана в Шлезскым Музею в Катовицях, пак буде єй можна видіти в Нацийональным Етноґрафічным Музею в Варшаві та Музею ім. Яцка Мальчевского в Радомі. Выставу мож обзерати в Катовицях до 12. жолтня/октобра тр.

«Лемківскы хыжы на Шляхтівскій Руси» нова выстава в Музею Сандецкой Землі

Музей Сандецкой Землі просит на выставу «Лемківскы хыжы на Шляхтівскій Руси» до філиі Пєніньского Музею. Выстава архівальных фотоґрафій презентує хыжы, церкви і придорожны кресты. Ціліст дополняют описы типів будівництва, материялів, покрытя і інтерєрів обєктів – розкладу поміщынь, выпосажыня ци прикрас. Выставу мож буде обзерати до кінця рока.

В Лоси побудуют ходник

В остатній ден квітня/апріля Повітове Староство в Ґорлицях підписало умову на реализацию дороговой інвестициі на обшыри ґміны Ропа. Бесіда о новым ходнику в Лоси. Інвестиция ма быти готова до 29. серпня/авґуста, а єй головном цілю єст поправа безпекы пішых, в дорозі м.ін. до працы ци школы. Як подал Староста Ґорлицкого Повіту, Мирослав Вальонґ, безпека жытелів повіту єст найважнійша. Підписаня умовы на реализацию задачы єст дальшым приміром успішной спілпрацы медже самоурядами, ефектом котрой сут конкретны інвестициі. Кошт реализациі проєкту то понад 560 тис. зл. Середкы на тоту ціль походят по половині з буджету Ґорлицкого Повіту і Ґміны Ропа.