Сумар дня на 7. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 7. вересня/септембра 2026 р.

Стіріча з Петром Мурянком в СНМ – Музею Русиньской Культуры в Пряшові

Словацкій Нацийональный Музей – Музей Русиньской Культуры в Пряшові просит на стрічу з вызначным діячом лемківской культуры – Петром Трохановскым, котрого Русины знают під писательскым псевдонімом Петро Мурянка. Буде свпівал, деклямувал, але головні розповідал о істориі Лемків. Стріча одбуде ся в четвер 17. вересня/септембра о 16.00 год. в просторах СНМ – Музею Русиньской Культуры в Пряшові.

Музей Модерной Штукы Енді Варголя в Меджелабірцях зас одкрытый

Музей Модерной Штукы Енді Варголя є зас одкрытый про одвиджаючых. Пряшівскій Самосправный Край, котрый є зряджувательом музею, до нього з властных середків, жупных еврофондів, як і з підпоры од державы інвестувал близко 16 мілийонів евро. Першых одвиджаючых Варголів музей привитал в пятницю 4. вересня/септембра. Вечер перед тым одбыл ся протоколярный проґрам про запрошеных гостів. Медже нима были президент Словацкой Республикы Петер Пеллеґріні, председа Нацийональной Рады СР Ріхард Раші, представникы дипломатичного корпусу, державы, самосправы, культурных і фаховых інституций, і дальшы гості зо Словациі і заграниці. Участ взял і Дональд Варголя, сыновец Енді Варгол1, котрый стал амбасадором святочного одкрытя. О тым, як змінил ся по реконструкциі Музей Модерной Штукы Енді Варголя, прочытате в дописі на нашым портали.

Рушыл конкурс оферт на анализу Климківкы

Польскы Воды оголосили конкурс оферт на анализу Климківского Резервуару цілю оціны зміны переплыву і рівня воды. Має то збільшыти протизаливову безпеку, ци доступ до воды для околичных жытелів в припаді сушы. Як подала Катажына Токаж з Державного Водного Господарства Польскы Воды в Ряшові, выконавця анализы буде мусіл представити розвязаня што до безпечного фунґуваня водной електровні в новых обставинах. В рамках замовліня опрацуваны будут гыдравлично-гыдролоґічна анализа вєдно з моделюваньом працы резервуару для ріжных вариянтів нового переплыву, анализа причын выступуваня завісины в воді, а тіж водный білянс зливиска для меншых переплывів та низшого рівня воды. Документация має тіж представляти зміны глубины резервуару і площыны заливу, а тіж брати до увагы климатичны зміны в перспективі найблизшых 20 років. Анализы выкажут, ци кількіст воды в зливни при мінімальным переплыві заґарантує біолоґічну неперерывніст рікы Ропа, примірно міґрацию рыб, і ци не спричынит то пересушыня сідлиск. Кєд опрацуваня потвердит можливіст утриманя в резервуарі высшого рівня воды, товды Реґіональный Заряд Водной Господаркы в Ряшові зачне працы над новым водно-правным оператом та інструкцийом господаруваня водом.

Мож іщы зголошувати своі пропозициі «Туристичных Скарбів Малопольщы»

Іщы лем до найближшой середы мож зголошувати своі пропозициi в осмій едициі конкурсу «Туристичны Скарбы Малопольщы». Цілю конкурсу єст выріжніти цікавы і вынятковы місця, подіі та туристичны атракциі в реґіоні. Зголосити мож не лем конкретну місцевіст ци атракцию, але тіж шлякы, подіі ци місце одпочынку. Вартат зато подумати, што на Лемковині заслугує на шырше вказаня. Конкурс має одкрытый характер, каждый може переслати свою пропозицию. Зголошыня приниманы сут в середу до кінця дня посередництвом електронічного формуляря.