Сумар дня на 21. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 21. жолтня/октобра 2026 р.

XVI Ден Коняра в Реґєтові

17. жолтня/октобра до Стайні Гуцульскых Кони «Ґладышів» в Реґєтові вернуло около 130 гуцульскых клячы з молодыма. Коні спровадили з толок в Выжнім Реґєтові. Поворот звірят з гірскых лук є традицийным елементом Дня Коняра, котрый роками орґанізуваный є в Реґєтові. То не лем подія для любителів кони, але тіж важный момент в річным циклю выпасаня гуцульскых кони. Село уж долго є звязане з гуцулами і належыт до найважнійшых осередків в Польщы, де ховают тоту расу. В рамках XVI Дня Коняра одбыл ся тіж традицийный Губертус — кінный хiд св. Губерта, звязаный з закінчыньом сезону кінной iзды. Подія притягнула до Реґєтова вельох жытелів реґіону, туристів і любителів кінных традиций.

Варштаты лінорыту в Рускiй Бурсі

24. жолтня/октобра о 12.00 год. в Рускiй Бурсі в Ґорлицях одбудут ся безплатны варштаты лінорыту. Занятя проведе русиньска ґрафічка Мартіна Сівчова. Лінорыт то ґрафічна техніка, в котрій рисунок вырізує ся в лінолеум, а пак переносит на папір при помочы фарбы. Участникы подіі будут мати нагоду познати основны принципы той технікы і самы попрібувати своіх сил в ґрафічній творчости. Варштаты одбудут ся в сідибi Руской Бурсы в Ґорлицях, што ся находит при Сєнкєвича 28. Участ є безплатна, краснi просиме вшыткых заiнтересуваных.

«Малы тролі і велика повін» по лемкiвскы

Зачала ся офіцийна продаж лемківского перекладу книжкы Тове Янсон «Малы тролі і велика повін» — першой повісти зо світа Мумінків. За переклад одповідат Петро Криницкій, котрый мат уж за собом пару значучых перекладів світовой літературы на лемківскій язык. Серед його робіт сут м.ін. «Малый прінц» Антуана де Сент-Екзюпері, «Віні Пу» Алана Александра Мілна, «Бомбель» Мирослава Нагача, «Звіряча фарма» Джорджа Орвелла ци «Кале топанкі» Вітя Ставярского. Тоты книжкы вартат собі припомнути і почытати — вказуют, же лемківскым языком мож передавати ріжны літературны світы, од дитячой клясикы по сучасну прозу. Книжку «Малы тролі і велика повін» мож купити, пишучы на адрес golem.seria@gmail.com. Ціна то 50 зл плюс кошты высылкы через Польску Почту або InPost. Є тіж можливіст особисто одобрати книжку в Ліщынах.

(Праві) 130-літній крест уж одремонтуваный

В Ганчовій закінчено консерваторскы роботы при історичным придорожным кресті з 1898 рока. Памятка находила ся при повітовій дорозі, што веде з Устя Руского через Ропу, Высову і Блiхнарку в напрямі державной границі. Реставрация обняла сам крест і його найблизше окружыня. Роботы мали на ціли зберечы історичный характер обєкту і забезпечыти го перед дальшым нищыньом. Кошт цілой задачы вынюс 35 тис. зл, з чого 10 тис. зл становило дофінансуваня з малопольского проґраму «Капличкы Малопольщы».

Райд «По стежках Никыфора і Гарасимовича по Лемковинi

24. жолтня/октобра Музей Сандецкой Землі запрашат на пішый райд «По стежках Никыфора і Гарасимовича по Лемковинi». Учасникы пройдут трасу з Ізб на Лацкову і назад. Ціла вандрівка мат трывати приблизно шіст годин. Райд буде нагодом не лем до гірской прогулькы, але тіж до познаваня істориі і культуровой спадковины реґіону через постати двох артистів, котрых творчіст была звязана з Карпатами і Лемковином: маляря Никыфора – Епiфана Дровняка, і поеты Юрия Гарасимовича. Участ в подii коштує 5 зл. Мотузок до iнформаций.

Фот: Facebook