Сумар дня на 19. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 19. жолтня/октобра 2026 р.

На ґали в Людзьмєжы вручено нагороду про вписаня лемківского языка на Деражвный список нематерияльной культурной спадковины

В пятницю 16. жолтня/октобра в Людзьмєжы одбыла ся ґаля вручаня рішынь о вписі на Державный список нематерияльной культурной спадковины. Припомнийме, што в 2026 р. рішыньом Міністры Культуры і Нацийональной Спадковины лемківскій язык был поміщеный на Державным списку нематерияльной культурной спадковины як носитель традициі, памяти і достоменности Лемків. Впис має помочы в захованю не лем самого языка, але цілого богатства культуры Лемків для дальшых поколінь. На ґали в Людзьмєжы представникы лемківской спільноты отримали нагороду – офіцийну грамоту про вписаня лемківского языка як носителя культурной спадковины Лемків на Деражвный список нематерияльной культурной спадковины. Лемківску спільноту репрезентували Наталия Малецка-Новак зо Стоваришыня «Руска Бурса» в Ґорлицях, проф. Олена Дуць-Файфер зо Стоваришыня Лемків, Юрий Стариньскій зо Стоваришыня Ансамбль Пісні і Танця «Кычера» та Домініка і Каміль Федериґы. Серед новых вписів нашли ся тіж реґіональны традициі і обряды, а тіж знаня звязаны з традицийным ремеслом.

Юрий Стариньскій одзначеный срібрным крестом «Заслуженый Культурі Gloria Artis»

Єдным з пунктів ґалі в Люджьмежы было тіж выріжніня осіб особливо заслуженых для охороны і популяризациі польской культуры. Серед доціненых єст Юрий Стариньскій, діяч і пропаґатор лемківской культуры. Рішыньом Міністры Культуры і Нацийональной Спадковины Марты Цєнковской, Юрий Стариньскій был одзначеный срібрным крестом «Заслуженый Культурі Gloria Artis». Ґратулюєме!

Одбыло ся 41. пленарне засіданя Округлого Стола Русинів Словациі

В Пряшові в пятницю 16. жолтня/октобра прошло 41. пленарне засіданя Округлого Стола Русинів Словациі (ОСРС). На стірчы были запрезентуваны активности, реализуваны во спілпрацы медже ОСРС а Пряшівскым Самосправным Крайом, оцінено тіж кампанію при нагоді одкрытя наново Музею Модерной Штукы Енді Варголя в Меджелабірцях пн. «Край Русинів і Енді Варголя». ОСРС дискутувал і о пляні будуваня водного резервуару Тихій Потік. Орґанізация приняла узнесіня проти будові, кєд же в результаті потерпіло бы русиньскє село Штельбах. Підтримано альтернативны крокы затримуваня воды. На засіданю бесідувано і о загорожынях звязаных з рыхтуваном новелизацийом шкільного закону, што окрем інчого змінят найнизше середнє чысло учеників в клясах і цілковите в школах, выхабляючы дотеперішній выняток, подля котрого мінімальны чысла не односили ся до кляс основных шкіл з навчальным языком нацийональной меншыны. Веце на тоту тему прочытате на нашым портали.

32. сесия Сойму Діти і Молодежы пройде з участю предстаників выбраных меншын

В просторах польского Сойму проходит днес 32. сесия Сойму Діти і Молодежы, з участю Маршалка Сойму. В подіі возме участ 459 учеників зо 153 едукацийных єдиниц. Дискутувати будут о проблемах, з якыма днес стрічат ся молодіж. Головным орґанізатором подіі єст Канцелярия Сойму, а спілорґанізатором Міністерство Нацийональной Едукациі. Подібні як влони, в тогорічній сесиі возмут участ ученикы репрезентуючы выбраны нацийональны і етнічны меншыны з підляшского воєвідства: Білорусины, Татары, Украінці і Литовці. Участ возме і делеґация молодіжных представників Модельового Парляменту Словациі.

Стріча з Марком Мачошковом в Музею Русиньской Культуры в Пряшові

Словацкій Нацийональный Музей – Музей Русиньской Культуры в Пряшові просит на стрічу з першом дамом народной пісні Марком Мачошковом. Бесіда і концерт пройде в будинку Русиньского Музею в Пряшові уж в налблизшый четвер 22. жолтня/октобра о 16.00. Подія з назвом «Моі наймилійшы» проходит в рамках проєкту «Серце музею биє про сеньорів», зато вступне про старшых є дармо.