Сумар дня на 20. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 19. жолтня/октобра 2026 р.

Бортне. Село вписане в реґістер…

В суботу 17. жолтня/октобра в музейній цервки свв. Космы і Даміяна в Борнтым одркыли выставу пн. «Бортне. Село вписане в реґістер. Фотоґрафічный запис». Експозиция прикликує образ села з 70. і 80. рокіц ХХ ст. – з часів, коли єй історичный просторовый уклад і традицийна забудова были обняты консерваторском охороном. Архівальны знимкы позваляют видіти Бортне, котрого в великій мірі уж неє. О ідеі выставы оповідат Клавдия Збєґєнь з Музею Дворы Карвациянів і Ґладышів в Ґорлицях:

В 1978 р. зачали ся роботы над проґрамом ревальоризациі Бортного. Консерваторы і бадачы зінвентаризували забудову, опрацували дрібницьовы рекомендациі для поєдных обєктів. Заплянували м.ін. музейны експозициі, удоступняня камінярскых варштатів, утворіня простору, котрый был припоминал жывый скансен. Векшіст з плянів ся не повела.

Істория Бортного вказує єднак не лем проблемы звязаны з охороном памятників, але тіж наслідства рішынь, котры были підниманы без участи мешканців. Впис до реґістру мал забезпечыти вынятковый культурный краєвид села, але для властителів хыж означал новы обовязкы і ограничыня.

Выставу мож обзерати до 29. листопада/новембра тр.

Лемковина Ультра Трейль – і того рока успішні

Чергова едиция Лемковина Ультра Трейль уж за нами. До Низкого Бескіду приіхали спортовці з цілой Польщы і заграниці, жебы змагати ся з гірскыма трасами на семох дистансах. Але Лемковина то не лем спорт. Од самого початку орґанізаторам залежало тіж на тым, жебы приближати історию і культуру Лемків. О думці на назву змагань оповідат його творця і директор Кжыштоф Ґайдзіньскій.

Лемковина притігат не лем досвідченых ультрамаратонців, але тіж аматорів. Для некотрых то обовязковый пункт бігового календаря. Так єст в примірі Old Energia Team з Ясла. О своіх вражынях оповідат Кжыштоф, єден з членів команды:

Серед стартуючых не бракло тіж Лемків. Юлиян Фурман з Ріпок поконал 30-кілометрову трасу. Як признає, літаня по родинных горах має для него і символичній вымір.

В тогорічній едициі змагань орґанізатор навязал тіж до сучасной лемківской штукы – схоснувал в візуальній ідентифікациі мотвы різбы Богдана Карела.

Проф. Дуць-Файфер о словнику в Пряшові

Заран о 13.00 год. в Інституті Русиньского Языка і Культуры на Пряшівскым Університеті одбуде ся 64. науковый семінар карпаторусиністикы. З доповідю пн. Ревітализация на основі автохтонности: «Контекстуальный словник лемківского языка» выступит др габ. Олена Дуць-Файфер, проф. Ягайлоньского Університету. Стрічу буде мож позерати тіж онляйново. Мотузок подаєме в Сумари Дня на портали lem.fm.