Сумар дня на 22. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 22. жолтня/октобра 2026 р.

Одбыл ся Лемківскій Кєрмеш в Йонкерс

В минулу неділю 18. жолтня/октобра в Йонкерс в штаті Ню Йорк одбыл ся дальшый Лемківскій Кєрмеш, якій што рока орґанізує Карпаторусиньскій Америцкій Центр Lemko Hall. Вчас забавы пригрывала русиньска ґрупа Lem Joy Trio. На Кєрмешы традицийно сходит ся много нашых родаків прожываючых в Америці – в великій части тоты, котры родили ся іщы в старым краю, але і молоды Лемкы, котры были роджены уж за великом млаком. Што барз тішыт, вельо з них хоснує лемківскій язык. Головным орґанізатором є Андрий Медвід.

Стрічы з Лемківском Культуром в Ґожові Великопольскым

Припоминаме, што Стоваришыня Лемків просит в найблизшу неділю на дальшу подію. 25. жолтня/октобра одбудут ся ХХХІІ Стрічы з Лемківском Культуром в Ґожові Великопольскым. Зачнут ся о 16.00 год. в Театрі ім. Юлиюша Остервы, до котрого подія вертат по парурічній переві, колиси одбывала ся літньом пором в центрі міста. Выступлят Лемко Тавер Юньор, Карпатія, Дамир та Ансамбль Народного Танця «Малы Ґожовякы». Вступне на подію то 40 зл (мож придбати в касі театру). Кус пізнійше, в днях 7.-8. листопада/новембра одбудут ся ХІХ Стрічы Трьох Поколінь з Лемківском Культуром, якы орґанізує пшемківскій Кружок СЛ. Того рока подія одбуде ся в першый ден в Пшемкові (початок о 16.00 год.), а другого дня в Любіні – в Центрі Культуры Муза – початок так само о 16.00 год.

Продолжат будова ґладышівской церкви

В Ґладышові продолжают роботы при будові православной церкви Рождества св. Йоана Хрестителя. В тых днях была зроблена елевация храму – церков была обита ззовни дощками. Вежа є крыта ґонтом. Скорше был выконаный монтаж выглядів а так само дубовых двери. Фурт видно поступы будовы, єднак перед спільнотом наступны етапы і звязаны з нима выдаткы. Парохія веде збірку грошів на дальшы роботы. Нова святыня творена є в формі, яка навязує до традицийной лемківской церковной архітектуры – і є репліком церкви з Незнайовой – будуваной на основі первістного проєкту.

Просиме на варштаты лінорыту

24. жолтня/октобра о 12.00 год. в Рускiй Бурсі в Ґорлицях одбудут ся безплатны варштаты лінорыту. Занятя проведе русиньска ґрафічка Мартіна Сівчова. Лінорыт то ґрафічна техніка, в котрій рисунок вырізує ся в лінолеум, а пак переносит на папір при помочы фарбы. Участникы подіі будут мати нагоду познати основны принципы той технікы і самы попрібувати своіх сил в ґрафічній творчости. Варштаты одбудут ся в сідибi Руской Бурсы в Ґорлицях, што ся находит при Сєнкєвича 28. Участ є безплатна, краснi просиме вшыткых заiнтересуваных.