Голосник

200. річниця народжыня Петра Кузмяка – суботні святкуваня в Рускым Керестурі

Як інформує пресова аґентура Рутенпрес, в найблизшу суботу, 1. жолтня/октобра т.р., в Рускым Керестурі будут проходити празднуваня з нагоды 200. річниці народжыня выдатного русиньского педаґоґа Петра Кузмяка. Проґрам з нагоды ювілею одбдуе ся в місцевій основній і середній школі в Рускым Керестурі, котрой патроном є Петро Кузмяк.

Проґрам ювілею зачне ся од 9.30 год. зложыньом квітя під памятником Петра Кумяка при шкічьним подвірци, а пак в голю одкрыта буде выстава і святочний проґрам, котрий на тот ден зрыхтют ученикы тамтышньой школы. По шкільных акцентах, од 10.00 год. Зачне ся Округлий стіл з темом: «200 років од народжыня Петра Кузмяка». Своі доповіди выголосят др Янко Рамач, Дюра Латяк та Миколай М. Цап, а модератором стрічы буде Сашо Сабадош. Дальше, емітуваний буде фільм про рідне село Кузмяка находяче ся на Пряшівскій Руси – Страняны, а презентацию про село і памяткы в тій місцевости на педаґоґа прирыхтували представителі Странян і Середньой Фаховой Школы з Попраду.

Педаґоґ

Петро Кузмяк народил ся 1816 році в селі Фольварк (днес Страняны), товдышнього Угорского Королівства, а вмер 13. січня/януара 1900 рока в Рускым Керестурі, в Войводині. То перший керестурскій шкільний учытель, педаґоґ, русиньскій писатель та церковний дяк.

Кінчучы науку в школах в Подолинци та Дебречыні, вступил Кузмяк в 1836 році до грекокатолицкого монастыря в Мукачеві. Єдночасно здобывал педаґоґічну освіту в Ужгороді. Церковного співу вывчыл ся під кєрівництвом Константина Матезоньского. Здобывшы квалифікацию учытеля та нотаря, лишыл Мукачево і переселил ся на Пряшівску Русь, де од 1838 до 1854 рока учытелювал в основній школі в русиньскых селах Шамброн і Якубяны. Был тіж дяком і нотарийом. Од 1855 рока через наступных 40 років робил в школі в Рускым Керестурі в Войводині. Заохочувал своіх учеників м.ін. до записуваня народной музыкы і пісен од місцевых Русинів. За педаґоґічны і освітовы заслугы названо його меном ґімназию в Рускым Керестурі основану по ІІ Світовій Войні.

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі