4-го септембра одкрыють по реконштрукції музей Варгола

Музей модерного уменя Енді Варгола в Меджілабірцях буде по великій рекоштруцкії знова одкрытый про навщівників.  Як інформовала Даша Єленьова, говоркыня Пряшівского самосправного краю (ПСК), святочне одкрытя одбуде ся 4-го септембра 2026-го року за участи Доналда Варголы, сыновця Енді Варгола, якый є амбасадором святочного одкрытя. Вступ буде почас одкрытя безплатный.

Музей модерного уменя Енді Варгола быв реконштруованый Пряшівскым самосправным крайом в роках 2023 аж 2026 і інвестіція майже 16 міліонів евр принесла комплексну модернізацію, котра музей змінила на надчасовый културный і ґалерійный простор присвяченый жывоту краля поп-арту.

„Варголів музей є про наш край і про цілу Словакію вынятковым місцьом. Я барз радый, же по роках інтензівной і складной роботы можеме людям передати зреконштруованый і єдночасно унікатный простор, котрый достойно презентує одказ єдного із найвызначнішых умелців 20-го столітя,“ повів председа ПСК Мілан Маєрьскый.

„Вірю, же обновленый музей принесе до реґіону новы імпулзы, притягне іщі веце навщівників із Словакії і заграніча, і стане місцьом, де будуть стрічати ся уменя, освіта і жыва култура. Бо скапчаня творчости світового умелця і його родины, Русинів, скапчаня уменя із модерныма елементами, приносить справды незабытный умелецькый зажыток про вшыткы віковы катеґорії,“ продовжовав Маєрьскый.

„Навщівници ся можуть тішыти на новы технічны і зажытковы новоты, котры тота будова приносить. Творы Енді Варгола собі теперь будуть уж в тот першый день нелем пасівно позерати, але дословно їх актівно зажыти. Бо реконштрукція дословно перепоїла оріґіналне уменя, модерну архітектуру, діґіталны технолоґії, але і освіту а културный турізм. Створила в музею условія про тото, жебы ся став єднов із выразных културных дестінацій Словакії із меджінародным пересягом. Зробили сьме вшытко про тото, жебы сьме сповнили сучасны высокы пожадавкы і очекованя домашнього і загранічного навщівника,“ повів директор Музею модерного уменя Енді Варгола в Меджілабірцях Мартін Цубяк.