40 років Сандецкого Етноґрафічного Парку

Тот рік єст для Округового Музею в Новым Санчы особливий – два з його одділів торжествуют округлы річниці свого істнуваня. Молодший ювіляр, Музей Никыфора в Креници, празднує своє 20-літя (о інавґурациі подій звязаных з празднуваньом ювілею писали сме гев), а два раз тілько часу отворений єст уж Сандецкій Етноґрафічний Парк. Докладні сорок років тому, в 1975 році, остал удоступнений звиджаючым.

Сандецкій Етноґрафічнй Парк зачато будувати в 1969 році. Ініцияторком Парку в кінци штістдесятых років была Ганна Пєньковска – товдышня Консерватор Забытків в Кракові. Проєктовы заложыня опрацували: в архітектонічній части Войцєх Щыґєл, а в етноґрафічній – Тадеуш Щепанек. Авторком концепциі скансену як експозициі тыпу музей-село єст Мария Бриляк-Залуска, а першым реалізатором, долголітнім кєрівником скансену та опікуном – Зыґмунт Левчук.

Сандецкій Етноґрафічнй Парк то місце, в котрым найдете традицийну народну культуру цілой сандецкой землі. Презентуваны сут гын забудовы типовы для Сандецкых Ляхів, Лоньскых Ґуралів, карпатксых Циґанів, Погірян і очывидні – Лемків. На 20 гектарах поміщено близко 70 объєктів, з котрых праві вшыткы то ориґінальны будовлі, розобраны в місци де початково были побудуваны, пак превезены до скансену. Медже нима сут м.ін. ґаздівскы загороды, лемківска церков, шляхетскій двір з загородом, ци фраґмент циґаньской осады. Середины хыж выпосажены сут в колишні меблі, ґратя, нарядя, части облечыня – словом вшытко, што завершат ся в тзв. материяльній культурі. Дополніньом того сут експонаты, вказуючы духове і соспільне жытя: традициі, звыкы, віруваня, маґію, або народну медицину.

Окрем забытків архітектуры, якы в Парку мож обзерати цілий рік, в літі орґанізуваны сут сезоновы показы традицийного ремесла і артистычной сельской творчости. Більше про скансен найдете на сайті Округового Музею в Новым Санчы.