60 років співу

„Марька юбілує“ 60 років співу має назву концерт Марькы Мачошковой і їй гостів, котрый одбуде ся дня 20-го септембра 2016-го року в Домі културы у Свіднику.

Покровительство над юбілейным концертом перевзяв пріматор міста Свідник Ян Голодняк, і окрім першой дамы русиньской народной співанкы буде мож видіти выступати Музику Мілана Рендоша, Барбору Фецкову, Тріо Світковых, Фолклорный колектів Варґовчан, солістку Анну Порачову, ці народноґо росповідача Йожка Йожку.

Марія Мачошкова належыть міджі найвызначнішы особности русиньского фолклору вже веце як пів столітя. Народила ся 30-го марца 1940-го року в русиньскім селі Потічкы во втогдышнім Словацькім штаті. По закінчіню гражданьской школы наступила до втогдышнього Піддуклянського українського народного ансамблю в Пряшові (ПУЛС), де в рр. 1956 – 1998 выступала як хорістка і перша солістка.

В 1964-ім році выступала із Бырнєнскым розгласовым орхестром народных інштрументів (Brněnský rozhlasový orchestr lidových nástrojů) і Цімбаловым орхестром ім. Яношка в Празі.

Є єднов із найвекшых популарізаторів русиньской народной співанкы нелем на Пряшівщіні, але в колишній Чехословакії обще. Од 1960-ых років шторік ходила із ПУЛС-ом або орхестром із Бырна до різных европскых держав ці Северной Америкы. Так само выступала в Споєных штатах Америкы в рамках соловых концертів. В 1969-ім році выступала на першім народнім фестівалі в Лемко-парку в Ню Йорку. Їй голос мож чути на многых албумах котры выдав ПУЛС або іншы ансамблі. В 1985-ім році была удостоєна тітулом заслуженой артісткы Чехословакії.

Актівна є доднесь. Концертує дома і за граніцями як солістка. У 2013-ім році знова завитала і до Споєных штатів Амеиркы, де абсолвовала турне в дакілько амерьцкых містах.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА