65-літя православной парафіі в Мальчыцях

4. червця т.р. в селі Мальчыці на Нижнім Шлеску проходило церковне свято. Православна парафія Успіня Пресвятой Богородиці празднувала своє 65-літя. З той нагоды парох і парафіяне рішыли празднувати тоту подію в почестний спосіб. Од 10.00 год. зачала ся Божеска Літургія, котрій проводил Высокопреосвященнійший Єремія, архієпископ вроцлавско-щеціньскій, враз з духовеньством православной церкви в Польщы.

По богослужынях мало місце посвячыня пропамятной таблиці з нагоды 65. річниці ериґуваня православной парафіі в Мальчыцях. Окрем той подіі, з парафіяльным праздником в Мальчыцях были повязаны тіж інчы річниці. Своє 40-літя  настоятельства в мальчыцкій парафіі святкувал о. Михал Шляґа.

Православна парафія в Мальчыцах офіцийно была ериґувана 24. мая 1950, коли по долгых старанях Уряд до справ вызнань передал мальчыцкій громаді поєвангелицку святыню. Неофіцийно, першы літургіі одбывали ся уж од 1949 рока, коли то на богослужыня доізджал священник. В роках 1953-1954 святыня остала пристосувана до потреб православной літургіі. Іконостас был привезений з церкви св. Михала Архангела в Кульній (Люблинщына). В більшости мальчыцкы парафіяне то Русины, котры остали выгнаны в 1947 році з рідных сел на Лемковині. До днес долголітнім парохом мальчыской церкви єст о. митр. Михал Шляґа. Парафіяльны книгы сут ведены од 1961 рока. Днес мальчыцка православна парафія то близко 50 родин.