ПСК вступив до нового функчного періоду. Маєрьскый є жупаном третій раз

Пряшівскый самосправный край (ПСК) вступив до нового функчного періоду 2026 – 2030. Святочну присягу в понедільок 9-го новембра 2026-го року склав председа краю Мілан Маєрьскый і новозволены посланці крайского парламенту, котры будуть найблизшы чотыри рокы вырішовати о далшім прямованю реґіону.

Председа Пряшівского самосправного краю Мілан Маєрьскый обгаїв у вольбах до Высшых теріторіалны цілків, котры одбыли ся 24-го октобра того року, свою функцію уж третій раз.

Як інформовала Даша Єленьова, говоркыня ПСК, свого нового мандату хопив ся вєдно із 63-ма посланцями Заступительства ПСК тым, же склали присягу на установлюючім засіданю крайского парламенту. Чотырьох посланців на тім засіданю не было присутных і свою присягу абсолвують в рамках найблизшых засідань Заступительства ПСК.

Святочне засіданя одбыло ся в історічній будові Театру Йонаша Заборьского в Пряшові.

Маєрьскый оголосив пріоріты

Мілан Маєьрскый, котрый є і председом хрістіаньскых демократів – KDH, здобыв у недавных крайскых вольбах як кандідат на жупана 48,77 процент голосів. Його найміцнішый протикандідат із крайньоправіцьового руху Republika Мілан Мазурек мав 38,15 процента. Но Мазурек кандідовав і за посланця крайского парламенту, де ся дістав і є, так як в попереднім функчнім періоді, єдиным представительом того руху в Заступительстві ПСК.

Маєрьскый у своїм приговорі підкреслив, же принимать довіру од людей із покоров і усвідомліньом одповідности. Новозволеных посланців вызвав на співпрацу, котра пересягує політічны розділы, і на гляданя рішінь на благо жытелів краю.

Меджі головныма пріорітами веджіня ПСК суть подля Маєрьского продовжованя модернізації драговой інфраштруктуры, знижованя реґіоналных розділів, векшы компетенції реґіонів і высша алокація еврофондів, підниманя якости освіты, дуступна здравотна і соціална опіка, як і підпора творіня якостных робочіх місць.

Заступительство має по новому 67 посланців

Новый крайскый парламент має по новому 67 посланців, в попереднім періоді то было о двох менше, із того 10 жен і 57 мужів. В заступительстві суть трьоми бывшы і девять сучасных пріматорів, сім старостів, шість посланців Народной рады Словацькой републікы, і єден посланець Европского парламенту.

Найміцніша є коаліція, за котру кандідовав жупан Маєрьскый – KDH, Hnutie Slovensko, SaS, Za ľudí , Konzervatívci – Kresťanská únia, котра має 26 мандатів. Другу найвекшу ґрупу творять незалежны кандідаты, котрых буде в крайскім парламенті сидіти 24. Владна партія Hlas-SD має чотырьох предастацвителів єднако як і коаліція Progresívne Slovensko, Demokrati. Лем єден мандат здобыла найміцніша владна партія Smer-SD, єднако так мають по єднім і Úsvit а Republika.

Караш продовжує, Дідик скінчів

В попереднім функчнім періоді были посланцями за окремы окресы ПСК і люди, якы суть познаты окрем іншого із русиньского руху.

Головным протикандідатом Маєрьского быв у 2022-ім році Михал Калиняк, родак із Меджілаборець, котрый кандідовав за Hlas-SD. Дістав ся втогды до крайского парламенту як посланець за окрес Пряшів. Теперь не кандідовав ани за жупана, ани за посланця.

У функції посланця Заступительства ПСК продовжує за окрес Стара Любовня Мартін Караш – председа Русиньской оброды на Словеньску, член Світовой рады Русинів за Словакію і член Рады влады СР про народностны меншыны. Так само як і в попереднім періоді кандідовав за Hlas-SD.

За тот самый окрес кандідовав успішно чотыри рокы тому Михал Дідик, староста села Чірч. І втогды і теперь кандідовав як незалежный, но тот рік не дістав потребну кількость голосів, і в крайскім парламенті скінчів. Дідик выграв вольбы старосты, і зіставать головов села Чірч.

Незалежный кандідат Михал Ільканин, котрого мож памятати іщі як актора Театру Александра Духновіча або модераторта русиньскых подій, першый раз дістав ся до крайского парламенту за окрес Свідник в минувшім функчнім періоді. Успішно кандідовав і теперь, і обгаїв свій мандат на далшы чотыри рокы.

Но в крайскім парламенті суть і далшы Русины, мож спомянути наприклад Яна Голинку, котрый успішно тот рік обгаїв мандат посланця Заступительства ПСК за окрес Снина, і старосты села Влыч.

Пріматоры в нашых реґіонах

Вєдно із вольбами до Высшых теріторіялных цілків – країв, проходили 24-го октобра і комуналны вольбы, в котрых собі люди выберали старостів сел, пріматорів міст і посланців містьскых або сельскых заступительств. Посмотрили сьме ся, як голосовали люди на пріматора в окресных містах в нашых реґіонах.

В Меджілабірцях зіставать пріматором Владислав Вышньовскый, котрый быв кандідатом партії Smer-SD.  Здобыв понад 58 процнет, причім його головный протикандідат Михал Калиняк, якый кандідовав за Hlas-SD, мав нецілых 37 процент голосів.

У Свіднику є зміна. Марцела Іванчова, кандідатка Hlas-SD, не обгаїла мандат пріматоркы, і новым пріматором у Свіднику є Ян Воок, котрый кандідовав як незалежный.

В Бардейові скінчів на посаді пріматора Борис Ганущак, котрый быв головов міста од 1999-го року. Пріматорьскый рекордер кандідовав за Hlas-SD, но теперь неуспішно. По майже 28 роках го вычеряв Мілослав Олеяр, котрый быв незалежным кандідатом. Здобыв понад 54 процент, Ганущак нецілых 41 процент голосів.

В Снині зістав і по вольбах пріматором Петер Волошин, кандідат хрістіаньскых демократів. Стара Любовня так само продовжує із староновым пріматором Любошом Томком, незалежным кандідатом, котрый здобыв майже 75 процент голосів. Зміна не є ани в Стропкові, де пріматор Ондрей Брендза як незалежный кандідат обгаїв свій мандат і дало му голос понад 72 процент голосуючіх.