Пряшівска архієпархія одкрыла Юбілейный рік

В середу 4-го новембра 2026-го року Пряшівска ґрекокатолицька архієпархія вступила до Юбілейного року блаженых мучеників, котрый закінчіть ся 5-го новембра 2027-го року. Інформовав о тім отець Михал Павлишиновіч, говорця Пряшівской архієпархії.

Выголошіня Юбілейного року блаженых мучеників одбыло ся в пряшівскім Катедралнім соборі святого Йоана Крестителя, і то в день 25-ой річніці беатіфікації священомученика Павла Петра Ґойдіча і мученика Мефтодія Домініка Тырчкы в Римі на Площі святого Петра. За блаженых їх выголосив Папа Римскый Йоан Павел ІІ.

Священомученик Василь Гопко быв беатіфікованый в Братіславі 14-го септембра 2003-го року тым самым Вселеньскым Архієрейом.

Участны вшыткы єпіскопи

На початку торжества прочітав установлюючій декрет юбілейного року канцеларь Архієпархіалной курії – отець Петро Качур.

Пак наслідовала архієрейска літурґія, котрой головным служытельом быв Высокопреосвященый владыка Йона Максим, пряшівскый архієпіскоп митрополіта, голова Ґрекокатолицькой церькви на Словакії.

Вєдно з ним служыли вшыткы єпархіалны і емерітны єпіскопи Рады єрархів Ґрекокатолицькой церькви на Словакії: Высокопреосвященый владыка Кіріл Василь – кошыцькый єпарха, Преосвященый владыка Мілан Лах – братіславскый єпарха, Высокопреосвященый владыка Йоан Бабяк – емерітный пряшівскый архієпіскоп, Преосвященый владыка Петро Руснак – емерітный братіславскый єпарха, Преосвященый владыка Мілан Хаутур – емерітный кошыцькый єпарха, і Преосвященый владыка Маріян Андрій Пацак – емерітный торонтьскый єпарха і теперішній апостольскый візітатор про ґрекокатоликів із Словакії, котры жыють в западній Европі.

Участь взяло і понад сто священиків, богату участь мали і монашкы Чіну святого Василія Великого а Згромаджіня сестер служебніць Непорочной Дівы Марії.

Кір Йона мав і проповідь, в котрій підкреслив, же святость не родить ся у вакуумі, але в конкретных родинах, жывотных обставинах і пробах, котрыма чоловік переходить.

На кінцю торжества молили ся участны в середнині храму перед тетраподом, на котрім были цілый час мощі вшыткых трьох блаженых новомучеників – Павла Петра Ґойдіча, Мефтодія Домініка Тырчкы і Василя Гопка, Молебен ку блаженому священомученикови Павлови.

Юбілейный рік припоминать веце річніць

Як уж было спомянуто, 4-го новемра минуло 25 років од дня, коли в Римі за блаженых были выголошены пряшівскый єпарха Павел Петро Ґойдіч ЧСВВ, і єромонах Мефтодій Домінік Тырчка ЗНІ.

Но в юбілейнім році припомянеме собі і далшы річніці. 100 років мине од єпіскопской хіротонії владыкы Павла, котра одбыла ся 25-го марца 1927-го року, і 80 років од єпіскопской хіротонії пряшівского помічного єпіскопа Василя Гопка, яка одбыла ся 11-го мая 1947-го року.

Так само собі припомянеме 105 років од приходу редемпторістів восточного обряду на теріторію днешньой Словакії, котрых іґуменом быв якраз блаженый Мефтодій.

Іншпіруюча святость

Моттом Юбілейного року блаженых мучеників є „Іншпіруюча святость“. Юбілейный рік має і своє лоґо.

Лоґо зображує візантійску єпіскопску митру із ініціалами Ґ і Г, котры суть повязаны із призвісками влаженых єпіскопів Ґойдіча і Гопка. В спідній части митры суть рокы 2026 – 2027, почас котрых тырвать юбілейный рік. Ціла митра в золотій фарбі є в незапертім крузі із золотой, синьой і червеной фарбы. Тоты фарбы сімболізують Божу охрану і славу, охрану Пресвятой Богородіці і любов а мучеництво. Домінантов кругу є зеленый палмовый молодник, якый сімболізує перемогу мучеництва.

Фото: Олександр Петах.