«70%» – Фестіваль в Зимній Воді, част 2 – неділя, 18.00 год.

Здає ся, же вшытко єст. Вшытко маш на лемківскым фестівали. Шашлык єст, стейк єст, і взагалі тілько преріжных страв, а до питя – не лем кава і гарбата…

Смо-ле, навет коктейлі ріжны сут, а кілько солодкого: і халва, і пахлава, і рахат-лукум, козинакы, щербет, а тіж чізкейкы, донаты, тірамісу… Вшытко ту купите: і пацюркы, і віночкы, і вышыты не по лемківскы сорочкы. А там дале, смотрте: для лемківскых діточок – тілько вшелеякых забавок з братнього Кытаю, а для дорослых – тіж дост вшелеякого кытайского… Ніт, ніт, ту не лем кытайскы річы ся продают! Ото книжкы розложены на столі – прецін не ієрогліфамы писаны, а такой кірилицьом, і писаны про Лемків! Єдным словом – правдива лемківска ватра!

Співанкы лемківскы тіж сут і не лем зо сцены они звучат. Но, зо сцены тіж. Але тоты зо сцены звучат часто за барз… сценічні. Видно, же тото дівча ци хлопец по лемківскы не треплют языком од рана до вечера, а деси з ютуба пісні вывчыли. А ту, як сой сядеш на траві, як сой выпєш кус правдивого лемківского коняку, як зіш правдивого лемківского шашлыка, як заспіваш – просто зо самого серця – правдиву лемківску співанку – то товды досправды одчуваш, же пришов єс на лемківскій фестіваль!

На фото видите шестый фестіваль в селі Зимна Вода, на сцені выступує ансамбль пісні і танця «Радваны» Луганьской Областной Філармоніі з міста Сєвєродонецка. Іх выступ, як і інчы зо Зимной Воды, тіж прозвучыт дгнеска – хоц передача буде не лем о тым фестівали. Кус побесідуєме о лемківскых ватрах так в загалі. Но бо чом бы і ніт?