«Слово» – 15-та неділя по Сошествії Святого Духа – неділя, 9.00 год

За Ісусом приходило в часі його земной діаятельности много людей з вопросами ці просьбами. Приходить Яірь, начальник сінаґоґы, просити за свою дівочку, котра умерала. Жена сірофінікійска тыж просить про здравля свойой дівочкы од мучіня злым духом.

Молодый чоловік приходить: Учітелю добрый, што доброго мам робити, жебы набыти вічный жывот?

Но днешній приход єдного знателя закона є іншый, пришов з наміріньом покушати Ісуса, поїмати його ці зневажыти. Ісус знав, же тот чоловік не приходить щіро, але наперек тому давать йому одповідь. Бо хоче ся дотулити тов одповідьов його сердця, но тыж тоты слова адресує і нам.

А з якым ворпосом приходить знатель закона: Котра заповідь в законі є велика? Ісус йому одповів: Перша і головна заповідь є любити Господа Бога цілым своїм сердцьом, душов, силами, думками. Друга є подобна: Будеш любити свого ближнього як самого себе. А Ісус додав: На тых двох заповідях є поставленый цілый закон і пророкы.

Так і нам ту наш Господь говорить о важности любви, котра мать проникати кажду єдну заповідь. І Апостол Павел повів: Кебы єм і роздав цілый свій маєток, своє тіло дав на спаліня.. а не мав бы-м любви, не принесе мі то ниякый хосен. Но Ісус на першім місці ставить любов ку Богу. Бо там, де не є любви ку Богу, там не є ани любви ку ближньому. Бо кедь чоловік подобно тым робітникам у винограді не мать перед собов Господа Бога, не старать ся жыти на його славу, жебы ся му залюбити в словах, ділах і думках, тогды якы обмеджіня його можуть сперати, жебы не робив зло ближньому, не сягав на його маєток, а може і найого здравля і жывот?

Вчера сьме чули, як апостолы вышли з храму і говорять Господу: Смоть, якы будовы. Но Ісус їм повів: Ці видите тото вшытко? Не остане ту камінь на камени. Тыма словами напоминать своїх ученикам і нас, жебы ся не дати стягнути надміру тым земным, жебы нам не затінило погляд горі. Прото перша заповідь є найголовніша. Выжадує цілого чоловіка, не припущать даякый компроміс з ідолами. Бо як ся чоловік дасть унести земным, свій погляд напрямує долов. Тратить зо свого погляду Бога і вічность. Тогды беззаконость мать вольну руку діятельности. А як ся беззаконость помножыть, любов самособов выхолодне.

А Ісус далше годоврить: повстане народ проти народу, царьство проти царьству. Так выстарчіть навести єден приклад. Коли іде о наслідство по родічах. Кедь чоловік не мать Бога перед очамии, не смотрить ани на нас, його найближшого, видить лем себе. Хоче про себе здобыти штонайвеце.

Як то видиме на єднім місці, кедь за Ісусом пришов єден чоловік з просьбов: Повідж мойому братови, най ся зо мнов поділить о наслідство. Но Ісус йому повів: Чоловіче, то хто ня установив быти меджі вами судцьом і ділительом меджі вами…

А наконець днешнє слово додавать: Як вы думате о сынови чоловіка? Тото є важнй вопрос, котрый Ісус кладе і нам. Ці говориме з Петром – ты Сын Божый Хрістос. Но Ісус нам повість: Говорять то твої уста лем або і твоє сердце а досвідчує і твій жывот? Або ся чоловік цалком не інтересує о Бога, о Хріста, не мать в своїм жывоті час на молитву, на духовный жывот? Або ся чоловік ставить нерпиятельскы, як то робили знателі Писма і фарізеї.

Ісус ку нам днесь говорить: Перша заповідь – будеш любити Господа Бога. Платить то і в моїм жывоті? Друга є подобна: Будеш любити свого ближнього як самого себе. Слова адресованы не лем тому знательови Писма і далшым, котры ся придавали духовно ку покушаню Хріста тым вопросом. Але суть то слова самого Бога, адресованы і ку нам: Як я думам о Хрістови? В своїх словах, в своїх ділах і в своїх думках… Слава Ісусу Хрісту!

В неділю, 13. септембра 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 13. септембра 2026 р. о 12.00 год. і 14. септембра 2026 р. о 2.00 год. за русиньскым часом.