«70%» – З Завадкы до Янова – ч. 3 – неділя, 18.00 год.

Доста дуже знимок з Лемками можеме найти в інтернеті з так званых Свят гір. Наприклад, тоты фотоґрафіі – з сайту Владка Максимовича Lemko.org (ним і кольоризуваны).

На «Святі гір» был шырокій проґрам, але там тіж польскы власти гейбы презентували переважні цивілизуваным і проґресивным мешканцям міст, любителям туризму і не лем – кус еґзотичных абориґенів – люди, якы, жыючы в горах, до тридцетых років заховали давну культуру, кус дивны строі, кольоровый автентичный фольклор.

На фото – «Свято гір» 1937 р., і єдны з участників – Лемкы з Завадкы Рыманівской, якы представляют традицийне весіля. За молодицю і молодого – брат з сестром. Вшыткы облечены в традицийны строі, на молодици – барвінковый вінец з вівсом…

На тым святі, певно, сельскы акторы были в центрі увагы, вшыткы зацікавлено призерали ся іх представліню. А коли вернули домів, то яли ся зас штоденной нелегкой працы, і каждый зас остал не актороом, а собом на своій рідній земли.

Вернеме же і мы кус до тых часів, до Завадкы Рыманівской…