«Радийочытальня»: Іван Русенко – субота, 18.00 год.

Сердечні просиме на новый проґрам радия Лем.фм «Радийочытальня».

Авдиция тота ма на ціли заохотити до познаваня творів лемківской літературы і чытаня текстів в лемківскым языку.

Чытачами будут ріжны люде, головні ученикы, котры, рыхтуючы ся до проґраму, вправляют ся в правильным чытаню, вымові, працуют над темпом і старают ся модулювати голосом. Часом ріжні тото выходит, бо для школярів награня до радия вказує ся стресуючым. Але прібуют радити собі зо стресом і охочо зголошуют ся до чытаня.

В першым одтинку «Радийочытальні» ученикы з Основной Школы ім. Александры Вислоцкой в Ґладышові змірили ся з творами Івана Русенка. Запрашаме до выслуханя першого одтинка в найблизшу суботу, 25. січня/януара 2020 р., о 18.00 годині.