На Лемковині побудуют новый резервуар

На обшыри Лемковины може быти побудуваный наступный резервуар. В місци давного села Климківка зроблено штучне озеро, тепер тырвают роботы над побудуваньом заливу на обшыри медже селами Конты і Мысцова.

Резервувар мал бы возникнути в найблизшых роках. Подля офіцияльных інформаций причыном заляня части обшыри ясельского повіту єст потреба збільшыня засобів питной воды.

Реальны пляны

Іщы недавно не каждый вірил, же побудуваный може быти резервуар, а тепер пляны його будовы сут штораз барже реальны. Потребу його створіня видят не лем центральны власти, але тіж двадцет самоурядів лежачых при ріці Вислока. Подля доступных інформаций побудуваня штучного озера на граници двох сел мало бы збільшыти засобы питной воды, а тіж забезпечати околичны місцевости перед заливами.

Проєкт будовы резервуару Конты-Мысцова єст єдном з головных задач взятых до увагы в зрыхтуваным властями Пляні Протидіяня Наслідствам Сушы на рокы 2021-2027.

Подля власти, в остатніх роках видно, што є штораз меньше воды в Вислоці, што влият на кількіст доступной для люди воды. Побудуваня резервуару має протидіяти наслідствам сушы, котра помалы стає ся фактом, і, згідні з рекомендациями власти, єст то стратеґічный і необхідній проєкт в тій части Польщы.

Окрем того, штучне озеро мало бы продіяти заливам. Резервуар забезпечал бы м.ін. перед нима Ясло, але тіж поможе протидіяти іх наслідствам в Дембици ци Мєльци.

Переселіня люди

Плянуваный резервуар буде ся находил на обшыри ясельского повіту і буде обнимал около 400 гектарів в ґміні Крампна і около 40 гектарів в ґміні Новый Змигород. В його середині може ся помістити 65,5 млд літрів воды. В часі залив резервуар буде міг помістити 19,5 млд літрів воды.

Проєктова документация мала бы быти опрацувана до кінця 2023 рока, жебы іщы в тым самым році зачали ся будовляны роботы. Завершыня робіт є плянуване на 2027 рік.

Інвестиция єднак не може ся зачати, покля не пройде переселіня 158 осіб замельдуваных на обшыри презначеной під чашу резервуару та розобраня около 100 хыж. Кошт цілой інвестициі то около 1 млд зл.

Проблем з запасами питной воды не єст новый, бо про будову резервуару як раз в тым місци бесідує ся уж до половины столітя. Заляна має быти не лем обшыр медже польскым селом Конты а лемківском Мысцовом, але тіж мал бы ся він розтігати по село Поляны, ачий по Крампну. Выжня част заливу буде прилігала до Маґурского Нацийонального Парку. Тым самым заляна была бы друга обшыр Лемковины – по побудуваным в першій пол. 90. років ХХ ст. заливі Климківка.