Вмер Михал Штеньо – ортопед, першый председа ЗІРС

Як інформовав голова Здружіня інтеліґенції Русинів Словеньска (ЗІРС) Ян Липиньскый, в пятніцю 23-го октобра 2026-го року вмер доц. МУДр. Михал Штеньо, к. н., вызначный русиньскый лікарь і першый председа ЗІРС. Вмер в Братіславі у віці 94 років.

Народив ся Михал Штеньо 5-го новембра 1931-го року в Кленовій в окресі Снина. Середньошкольскы штудії абсолвовав на Руській ґімназії в Гуменнім. Кедьже вырішыв, же хоче людям помагати, лічіти їх, по матуріті одышов до Братіславы, де выштудовав Лікарьску факулту Універзіты Коменьского.

Но тым його штудії не закінчіли ся. Почас свого довгого професіоналного жывота лікаря – ортопеда, абсолвовав стажи у Великобрітанії, бывшій Югославіі, в бывшім Совітьскім союзі, в Німецьку, Швейцарії, в Споєных штатах Америкы ці в Австрії.

В роках 1972 аж 1986 быв прімаром І. Ортопедічной клінікы в Братіславі, у 1986-ім році быв при основаню ІІ. Ортопедічной клінікы Лікарьской факулты Універзіты Коменьского в Братіславі – Ружінові, котру вів як предноста аж до свого пензійного віку.

Михал Штеньо мав богату научно-бадательску діятельность, почас лікарьской карьєры довгодобо діяв як народный делеґат у веджіню Европской федерації ортопедічных і травматолоґічных обществ, быв многократным участником конґресів Світового ортопедічного і травматолоґічного общества по цілім світі. У своїм лікарьскім фаху робив далше і по своїм одході до пензії.

Попри своїй професіоналній карьєрі і тім, же цілый дорослый жывот пережыв у Братіславі, ниґда не забыв на своє русиньске походжіня.

По 1989-ім році залучів ся і до русиньского руху, і в році 1995 быв єдным із основателів Здружіня інтеліґенції Русинів Словеньска.  Тоту орґанізацію пак веце як двадцять років вів на посаді председы.

В році 1997 ЗІРС подало успішну скаргу на Словацьке радіо (Slovenský rozhlas) за нерешпектованя прав Русинів у области радіового высыланя. Вдяка тій скарзі пак Русины дістали свою властну редакцію і властне высыланя у тім верейноправнім медію.

Так само здружіня під його веджіньом в роках 2001 і 2011 на себе взяло рішучу роль в інформачных кампанях перед списованьом жытелів.

Окрем того Михал Штеньо быв і честным председом політічной парії Наш Край, котра мала быти русиньсков.

У 2013-ім році быв Михал Штеньо выголошеный за русиньску особность рока. Оцінююча жюрі в складі Владимір Лихварь, Ян Липиньскый і Михал Міценко втогды вырішыла оцінити його ціложывотный вклад і тырвалый хосен про розвиток русиньского народа. Вічная память!