Пряшівска ґрекокатолицька метрополія підпорить віруючіх в Бейруті фінанчнов збірков

Пряшівскый ґрекокатолицькый архієпіскоп і метрополіта Йоан Бабяк по договорі з архієпіскопом Кірілом Васильом, апостольскым адміністратором Кошыцькой ґрекокатолицькой єпархії і владыком Петром Руснаком, братіславскым єпархом выголосив на 30-го авґуста міморядну збірку у вшыткых парохіях Ґрекокатолицькой метрополітной церькви sui iuris на Словакії.

Збірка має іти на підпору восточных католицькых хрістіанів, котры суть траплены наслідками експлозії в столиці Лібанону, в Бейруті. Інформовав о тім Інформачный центер Ґрекокатолицькой архієпархії.

Дві ничівы експлозії в Бейруті з 4-го авґуста 2020-го року взяли жывот веце як 170-ом людям, тісячі были зранены і понад 300 тісяч людей зістало без стріхы над головов. Волна тиску по експлозії пошкодила веце катедралных соборів і храмы, з фунґованя вырадила три з пятьох великых шпыталів у Бейруті.

Выразили солідарность

Такой по тій нещастній події выразили свою солідарность з лібаноньскыма віруючіма і єрархове Ґрекокатолицькой церькви на Словакії. Метрополіта Йоан адресовав свою близкость мелхітьскому патріархови Юссефови Абсі, котрого утвердив о своїх молитвах і близкости з йому звіреным народом.

„Молю ся за жертвы того нещастя і за їх родины, так само за зраненых, ці людей, котры пришли о своє обыстя,“ цітовав Інформачный центер Пряшівской архієпархії метрополіту Бабяка.

Солідарность выразив і архієпіскоп Кіріл Василь. „Най понад вшытко милосердный Бог у своїй любви до чоловіка, на ородованя той, котру народ Лібанону честує в їй храмі на Гаріссі над Бейрутом як Нашу Пані Лібанону, уділить кріпость і потіху вшыткым, котры были постижены тов траґедійов, головно стратов, ці зраніньом своїх наблизшых, і єднако най дає сило і мудрость вшыткым заінтересованым на одстраньованю їй наслідків.“

Центер трьох партіархатів

В Лібаноні діє веце восточных католицькых церьквей і в прямо в Бейруті мають центер три патріархаты.

Найвекша є мароністька церьков, котрой походжіня є в антіохійскій традіції і веде єй патріарха Бехара Бутрос кардінал Раї. Далшє є то сірійска католицька церьков, котра так само выходить з антіохійской традіції, на чолі котрой стоїть Іґнаце Йосеф ІІІ. (Ефрем) Юнан. Третьов патріархалнов церьквов, котра має свій центер в Бейруті, є армяньска церьков, выходить із армяньской традції, котрой головов є Ґреґоіре (Крікор) Пієрр ХХ. Ґаброян.

Другов найвекшов за кількостьов віруючіх в Лібаноні є Мелхітьска ґрекокатолицька церьков, візантійской традіції, котрой головов є патріарха Юссеф Абсі.

Патріарха має свою резіденцію в сірійскій столиці Дамаск, але почас рока вецераз урядує і в резіденції в Бейруті. Минувшый рік навщівив і Словакію а окрім офіціалных стріч із представителями властей брав участь і на архієпархіалнім одпусті в Літмановій, а так само навщівив і центер метрополії Пряшів.

Жрідло фотоґрафії: Mehr News Agency, CC BY 4.0

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА