Церков в Рыхвалді з модерным протиогньовым системом

В памятковій грекокатолицкій церкви Покровы Пресвятой Богородиці в Рыхвалді закінчыл ся монтаж протиогньового систему FOG. Был то другій етап інвестициі, котра має хоронити храм, якій є вписаный на список світовой спадковины UNESCO.

Другій етап был можливый завдякы высокій фінансовій підпорі і спілпраци ґміны Санкова з місцевом парохійом.

Просто спокій

Про власти ґміны і парохіян рыхвалдского храму завершыня проєкту звязаного з монтажом систему значыт просто спокій і безпеку іх памяткового храму. Хоц інвестиция коштувала близко 450 тис. зл, то была необхідна, жебы хоронити тоту єдну з ціннійшых церкви на Лемковині.

Роботы повязаны з системом FOG поділены были на два етапы. В першым замонтувана была ціла протиогньова інсталяция з окаблюваньом. В другым был поміщеный резервуар воды з помповньом.

Потрібны грошы здобыли од Повітового Староства в Ґорлицях та од Міністерства Культуры і Нацийональной Спадковины, котре передало на другій етап інвестициі близко половину грошы (дофінансуваня было 230 тис. зл). Полный монтаж протиогньового систему занял два рокы. Фіналізация прошла аж тепер.

Систем хоронит перед загорожыньом огня од середины храму, але тіж перед зовнішніма факторами, такыма як перуны або підпаліня. Коли сенсоры выкрыют дашто неправильне, інформация іде одраз до дижурного в повітовій коменді протиогньовой стражы.

Подібный систем замонтували уж в церкви св. Якова в Поворознику, котра так само находит ся на списку світовой спадковины UNESCO. Два інчы лемківскы храмы, котры ся на тым списку находят, a сут на обшыри ґорлицкого повіту, то церкви в Квятони і Брунарах. Послідня з лемківскых церкви UNESCO находит ся в Туриньску (східня Лемковина). На тот момент неє в них систему FOG, а тот постеріганый є за найбарже успішный в гашыню огня. Проблемом сут грошы. Кошт монтажу систему то близко піл млн зл.

Рыхвалдска церков

Грекокатолицка церков Покровы Пресвятой Богородиці в Рыхвалді была поставлена в 1653 р. Храм через рокы был парократно модернізуваный, а остатній ремонт был в 80. роках ХХ ст. На стінах находит ся розпис з 1938 р. В середині є бароковый іконостас з XVIII ст. та два бічны іконостасы. В 2013 р. рыхвалдска церков была зачыслена до списку UNESCO як єден з пятьох русиньскых храмів на Лемковині.