Академік НАН Україны: Русины мають право на своє «я»

Україньскый історік і академік Націоналной академії наук Україны Петро Толочко в ефірі телеканалу 112 Україна коментовав сучасны дії на Україні. Меджі іншым спомянув і Русинів. На высловы академіка звернув увагу портал zik.

Толочко спомянув Русинів в повязаню із коментованьом нападів на храмы на Україні. Спор о храмы веде ся довшый час меджі Україньсков православнов церьквов і Православнов церьквов Україны, котра офіціално выникла у 2018-ім році і робить собо претензії на храмы.

„Я вже давно на світі жыю, но такый припад, якый мы днесь виділи (смотрили перед тым на інцідент при храмі, позн. ред.) мене просто депрімує. Не розумію, яку країну будуєме. Країну, в якій комфортно мать жыти каждый граждан або країну тоталітарьну, котру хотять дати до єдного мундуру – я так хочу, і так буде? І так не має быти,“ повів україньскый історік

„Комусь не любить ся російскый язык – заборониме російскый язык, комусь не любить ся мадярьскый язык – заборониме мадярьскый язык, комусь не люблять ся Русины на Закарпатю – заборониме іщі і саме званя Русин. Тым людям захотіло ся взяти православным Україньской православной церькви храм – возьмеме. Вкіцні, є на Україні влада, ці не є?,“ продовжовав далше Толочко в коментованю сітуації, причім сам высловив думку, же влада якраз покликана на тото, жебы забезпечіти комфортный жывот про каждого граждана.

„Хто говорить такым языком – най говорить такым языком, хто молить ся в єдній церькви – най ся молить там, де ся му любить, хто плекать своє історічне коріня, як Русины на Закарпатю – най плекають. Они вшыткы суть послухняныма гражданами Україны, вшыткы платять дани, і вшыткы мають право на своє я,“ повів у высыланю телевізії Петро Толочко.

Припоминаме, же Україна як єдина країна, в кторій жыють Русины, не вызнала їх дотеперь за окремый народ, і продовжує в українізації русиньского населіня.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА