Од понеділька ремонт ґорлицкой ул. Міцкєвича. Будут ограничыня руху

В найблизшых днях зачне ся ремонт єдной з головных доріг в Ґорлицях. В звзязку з тым даякій час будут обовязувати ограничыня в руху, а тото значыт, што треба буде ся зрыхтувати на коркы.

Од понеділька, 1. марця 2021 рока, веденый буде ремонт улиці Міцкєвича, яка находит ся в самым центрі міста і веде через рынок. На ній буде положеный новый асфальт, а окрем самой улиці Міцкевича змодернізувана буде і частинно улиця Стружівска. Роботы повязаны будут з часовом зміном орґанізациі руху в тым районі міста, зато мусиме быти вырозумілы і терпеливы.

Першый етап зачне ся як раз в найблизшый понедільок. Закрыта буде цілковито ул. Міцкєвича на высокости ул. Пєкарской до ул. Надбжежной. Працы на тым одтинку мают ся скінчыти протягом трьох тыжни, хоц даты тоты сут лем інструкцийны, а сама інвестиция може ся перенести в часі. В тым часі рух в околицях ґорлицкого рынку буде одбывал ся од ул. Врублевского через ул. Стружівску і од ул. Узкой до ул. Стружівской.

Другій етап робіт зачне ся коло 22. марця. Товды вылученый буде рух на ул. Стружівскій до крижівкы з ул. Колонтая. По великодніх святах (за новым стильом) плянуванє єст розложыня нового асфальту. Друга част робіт має заняти приблизно два тыжні.

Місто Ґорлиці на ремонт речоного одтинка отримало 50% дофінансуваня з Фонду Самоурядовых Доріг. Цілковита вартіст проєкту то понад 973 тис. зл.