Сумар дня на 8. марця 2021 р.

Приносиме вам сумар медияльной ґрупы ЛЕМ.фм+ на ден 8. марця 2021 р.

Архієпископ і митрополита гайдудорожскій на авдиєнциі в папы римского

В суботу, 27. лютого/фебруара тр., папа римскій Франциск принял на авдиєнцию єрарху грекокатолицкой Мадярской Церкви Высокопреосвященнійшого владыку Філіпа Кочіша, архієпископа і митрополиту гайдудорожского. Перепис інтервю, якє по стрічы з папом Франциском дал митрополита Філіп для Радия Ватікана, мож прочытати на портали Vatican News. Митрополита з головом Католицкой Церкви окрем задач, котры стоят перед Мадярском Грекокатолицком Митрополийом, ци приготовлінь Евхаристичного Конґресу в Будапешті, бесідувал і о ситуациі грекокатоликів в Мукачівскій Грекокатолицкій Єпархіі. За словами митрополиты будучніст Макачівской Єпархіі являт ся одкрытым вопросом. Подля владыкы вельонародне і вельокултурове Підкарпатя хоц днес є частю Украіны, то еклезийолоґічно, з церковной точкы пізріня, треба і мож го тримати окремом церковном єдиницьом, sui iuris, тє. незалежном од Украіньской Грекокатолицкой Церкви. За окремом церковном структуром оповіл ся так само владыка Ніль Лущак, апостольскій адміністратор Мукачівской Грекокатолицкой Єпархіі.

Економічный Форум і Европейскій Фестіваль Бігів в Креници

Бургомайстер Крениці Пьотр Рыба поінформувал, што 4. марця тр. был підписаный Інтенцийный Лист, тыкаючый орґанізациі в Креници Економічного Форум та Европейского Фестівалю Бігів, якы мают проходити в вересни/семтембрі тр. До порозумліня дошло медже Малопольскым Воєвідством, Ґміном Крениця, Курортом Крениця-Жеґєстів і Економічным Університетом в Кракові, якій буде тримал науковый патронат над креницкым Економічным Форум. Орґанізаторы обох подій мают быти неодолга вказаны Малопольскым Воєвідством.

В Карпатскым Лісі можут зробити 20 мікрорезерватів природы

Є шанса, жебы на обшыри Карпатского Ліса створити 20 мікрорезерватів, якы дозволят сохранити стары дерева і підпорити охорону поростів і птахів. О створіня мікрорезерватів буде внескувала Фундация Природнича Спадковина. Двадцет зон охороны, о котрых створіня внескує фундация, буде зголошеных на обшыри 15 карпатскых надлісництв: Ґорлиці, Лося, Рыманів, Дукля, Команча, Динів, Балигород, Березів, Тисна, Ліско, Лютовиска, Бірча, Ступосяны, Устрикы Нижні та Красічын. Створіня мікрорезерватів буде можливе завдякы фінансовій підпорі ґрупы Mercator Medical. Завдякы діяльности Фундациі Природнича Спадковина в Карпатскым Лісі дотепер повело ся створити 144 зоны для беркутів, крикунів, сычів воробинных, чорного боцана і поростів. Двадцет дальшых буде зголошеных до кінця 2021 рока. Кошт зробліня єдной зоны то 1000 зл.

«Святіст в простоті» – выстава творів Новосільского в Калішы

Од пятниці, 5. марця, в Водонапорній Вежы в Калішы мож обзерати выставу творів вызнаного лемківского артисты і православного теолоґа Юрия Новосільского. Наголовок выставы то «Святіст в простоті». Буде на ній мож видіти 20 творів артисты з серий «Мандилийон» і «Богородиця». Як бесідує Пьотр Біґора, директор Осередка Плястичной Культуры Водонапорна Вежа, выстава має провокувати публику до дискусиі про приниманя штукы вчас пандеміі, форму єй переданя і границ. Выстава буде одкрыта до 2. квітня/апріля тр.

Реґіональный Конкурс на Народну Писанку і Обрядову Плястику

Етноґрафічный Музей в Тарнові просит до участи в 31. едициі Реґіонального Конкурсу на Народну Писанку і Обрядову Плястику звязану з Великодньом. Вынятково акция пройде в гыбридовій формі в Тарнівскым Етноґрафінчным Музею, в днях 22.-27. марця тр. Цілю конкурсу єст плекати, підтримувати і документувати народну традицию крашыня яєц і пошырювати обядову штуку звязану з періодом Пасхы. До участи прошены сут діти, молодіж і дорослы народны творці та інституциі культуры і освіты з повітів: новосандецкого, лимановского, домбровского, бохеньского, бжеского і тарнівского. Злолошыня мож слати до 15. марця.