Приносиме вам сумар медияльной ґрупы ЛЕМ.фм+ на ден 16. листопада/новембра 2026 р.
Studium Carpatho-Ruthenorum 2027
Інститут Русиньского Языка і Культуры Пряшівского Університету просит до участи в 15. річнику Медженародной Літньой Школы Русиньского Языка і Культуры – Studium Carpatho-Ruthenorum 2027. Школа пройде в днях о од 6. до 26. червця/юнія 2027 р. Studium Carpatho-Ruthenorum то шторічный едукацийный проґрам, заміряный на вчыня русиньского языка, істориі, літературы, культуры і етноґрафіі Карпатскых Русинів. Лекциі ведены сут в русиньскым і анґлицкым языках і берут в них участ ученикы з ріжных держав. Є то єдина того типу школа на світі. Проґрам обнимат парудесят клясичных лекцийных годин, але тіж цілый шор додатковых атракций, як презентациі фольклору, прогулькы, театральны і фільмовы вечеры, варштаты і інтеґрацийны стрічы. Як дахто хоче быти інформуваный о рыхтуваным 15. річнику Літньой Школы, може выполнити формуляр на вебсайті Центра Языків і Культур Нацийональных Неншын Пряшівского Університету, подаючы свій майльовый адрес.
В Новым Санчы бесідували о Стратеґіі Розвитку Малопольского Воєвідства 2035
Як інформувал віцемаршалок малопольского воєвідства Вітольд Козловскій, прошла дальша реґіональна дебата присвячена консультациям проєкту актуализациі Стратеґіі Розвитку Малопольского Воєвідства 2035. Стріча одбыла ся в Містным Центрі Культуры Сокіл в Новым Санчы. Бесіда тыкала напрямів розвитку Малопольщы, найважнійшых вызвань і проєктів, котры будут формувати будучніст реґіону. Віцемаршалок підкрислил, што важне єст консеквентне ведіня політикы зрівноваженого розвитку, што бере до увагы потребы вшыткых части воєвідства.
В Ґорлицях возникне Музей Східнього Фронту І Світовой Войны
В середу 11. листопада/новембра Міністерство Культуры і Нацийональной Спадковины подало комунікат о основаню в Ґорлицях Музею Східнього Фронту І Світовой Войны. Нову інституцию будут вести довєдна Міністерство Культуры і Нацийональной Спадковины і місто Ґорлиці. Музей буде першом в Середньо-Східній Европі модерном музейном інституцийом вполни посвяченом діям східнього фронту І світовой войны. Буде м.ін. упамятнял Битву під Ґорлицями з 2. мая 1915 рока, як і приближыт історию борб на шырокій обшыри східнього фронту і долю люди, котры брали в них участ. Будинок має возникнути попри Воєнным Цмонтері нр 91 на Цмонтерній Горі в Ґорлицях, місци будучым єдным з найважнійшых свідоцтв траґічных подій сперед понад стох років. Новый музей не буде оповідал лем о подіях з найблизшой околиці. Концепция музею была опрацувана в рамках проєкту GOV4PeaCE Радом Музею, при участи експертів з Медженародной Порадничой Рады – з Бельгіі, Італиі, Словеніі, Латвіі і Словациі. Закладат она вказаня дій східнього фронту в шырокым, европейскым контексті, через презентуваня ріжных перспектив і воєнных досвідчынь – творячы простір до діалоґу і едукациі.
Реактивация лыжной стациі в Щавнику зас непевна
Реактивация лыжной стациі в Щавнику зас єст непевна. Думка, жебы зас одкрыти вытяг в Щавнику, явила ся іщы в 2021 р. Од того часу тырвали стараня о выданя середовискового рішыня. Процес был неспокійный і стрічал ся з одкликанями. Фінально обсяг інвестициі мусіл быти ограниченый, мимо шырокых протестів жытелів Щавника і представників туристичной бранжы. Вкінци, літом того рока бургомайстер Мушыны Ян Ґольба поінформувал, што є згода зо стороны Реґіональной Дирекциі Охороны Середовиска, завдякы чому міг выдати середовискове рішыня для будовы лыжной стациі в Щавнику. Тепер перед інвестицийом явили ся єднак перешкоды. Три проеколоґічны орґанізациі зложыли одкликаня од выданого бургомайстром рішыня. Розсмотріньом іх займе ся тепер Самоурядовa Апеляцийна Колеґія в Новым Санчы.







