Сумар дня на 12. листопада/новембра 2026 р.

Приносиме вам сумар медияльной ґрупы ЛЕМ.фм+ на ден 12. листопада/новембра 2026 р.

Просиме до Розстайного

В суботу, 14. листопада/новембра, о 11.00 год. в Розстайным одбуде ся посвячыня капличкы, котра має припоминати о давній грекокатолицкій церкви святых Космы і Даміяна. Храм стоял колиси в тым лемківскым селі, але по выселіню жытелів был розобраный. Деревяну каплицю на давным церквиску фундувал Михал Хомик зо Святковы Малой, котрый од років жыє в Зъєднаных Штатах Америкы. Обєкт має припоминати історию села, котрого уж ніт, і його давного храму. Торжества заплянувано на давным церквиску в Розстайным, при дорозі чысло 992 помедже Крампном а Грабом. Каплицю посвятит митрополита Євген Попопович, владыка грекокатолицкой перемышльско-варшавской єпархіі.

ПСК вступил до нового функцийного періоду

Пряшівскій Самосправный Край (ПСК) вступил до нового функцийного періоду 2026-2030. Святочну присягу в мунилый понедільок склал председа краю Мілян Маєрскій і нововыбраны посланці крайского парляменту, котры будут найблизшы штырі рокы вырішувати о дальшым прямуваню реґіону. Маєрскій в своій функциі буде уж третій раз. Святочне засіданя одбыло ся в історічній будові Театру Йонаша Заборского в Пряшові. Медже головныма пріоритетами для ПСК сут подля Маєрского продолжуваня модернізациі дороговой інфраструктуры, знижуваня реґіональных розділів, векшы компетенциі реґіонів і высша алокация еврофондів, підниманя якости освіты, доступна здравотна і социяльна опіка, як і підпора творіня якістных робочых місц. В функциі посланця Заступительства ПСК продолжує за окрес Стара Любовня Мартін Караш – председа Русиньской Оброды на Словациі, член Світовой Рады Русинів за Словацию і член Рады Влады СР про нацийональны меншыны. Упсішно мандат здобыл і Михал Дідик, староста села Чырч. За окрес Свидник достал ся і Михал Ільканич, котрого мож памятати іщы як актора Театру Александра Духновича або модератора русиньскых подій. В крайскым парляменті сут і дальшы представникы Русинів.

Ден Русинів 2026

Як каждого рока 5. грудня/децембра будеме святкувати Ден Русинів Польщы – наше нацийональне свято, призначене на памятку фльориньского віче з 1918 р., якє дало початок Рускій Народній Республиці Лемків. Тогорічны святкуваня одбудут ся точночно 5. грудня/децембра, в суботу. Подія зачне ся о 14.00 год. при давній грекокатолицкій плебаніі во Фльоринці, де зыйдеме ся, штобы упамятнити подіі сперед 108 років. О 15.00 год. в просторах ґорлицкой Руской Бурсы пройде культурный проґам, в котрым выступлят окрем ансамблю Терочказ Ґорлиц, Осиф Пантликаш (актот Театру Александра Духновича в Пряшові) і Дует Вспак. На святкуваня 5. грудня/децембра просят довєдна Стоваришыня «Руска Бурса» в Ґорлицях та Стоваришыня Лемків.

Іщы до неділі мож видіти «eLEMentarz»

Кєд сте іщы не виділи, мате послідню можливіст. Іщы лем до найблизшой неділі 15. листопада/новембра в Ґалериі Центра Творчых Діянь в Любіні мож обзерати выставу авторства Йоанны Фучко з назвом «eLEMentarz», што проходит в рамках циклю «Лемкы в Центрі». Артистка сігат до корени і через сучасны ілюстрациі вказує слова в лемківскым языку. Іх значыня, звучаня і асоцияциі остают заложыньом до бесіды о дідовизні і пробі єй захованя. Фестіваль «Лемкы в Центрі» зачал ся 5. жолтня/октобра. В його рамках одбыли ся ріжны подіі, м.ін. концерты, варштаты писаня ікон ци стріча зо свідком траґічной акциі «Вісла».