Сумар дня на 10. листопада/новембра 2026 р.

Приносиме вам сумар медияльной ґрупы ЛЕМ.фм+ на ден 10. листопада/новембра 2026 р.

Ювілейный Рік Блаженных Мучеників Пряшівской Грекокатолицкой Архієпархіi

4. листопада/новембра Пряшівска Грекокатолицка Архієпархія одкрыла Ювілейный Рік Блаженных Мучеників, котрый буде тырвал до 5. листопада/новембра 2027. Выголошыня одбыло ся в Катедральным Соборі Святого Йоана Крестителя в Пряшові, в 25. річницю беатифікациі священномученика Павла Петра Ґойдича і мученика Методия Домініка Тырчкы. Участ в торжествах взяли вшыткы єпископы Грекокатолицкой Церкви на Словациі, понад стох священників, а тіж монахы і монашкы. Архієрейску літургію служыл пряшівскій архієпископ і митрополита Йона Максим. Пiдчас Ювілейного Рока будут припоминаны і інчы важны річниці: 100 років од єпископской хіротоніі Павла Петра Ґойдича, 80 років од хіротоніі Василя Гопка, а тіж 105 років од приходу редемптористів схiднього обряду на територию днешньой Словациі. Моттом Ювілейного Рока сут слова «Інспіруюча святiст».

В Розстайным посвятят нову капличку

В суботу, 14. листопада/новембра, о 11.00 год. в Розстайным одбуде ся посвячыня капличкы, котра є репліком давной грекокатолицкой церкви святых Космы і Даміяна. Храм стоял колиси в тым лемківскым селі, але по выселіню жытелів был розобраный. Малу деревяну капличку на давным церквиску фундувал Михал Хомик зо Святковы Малой, котрый од років жыє в Зъєднаных Штатах Америкы. Обєкт має припоминати історию села, котрого уж неє, і його давного храму. Як інформує порталь Beskid Niski, капличка має служыти римокатолицкым, грекокатолицкым і православным священникам. Торжества заплянувано на давным церквиску в Розстайным, при дорозі чысло 992 помедже Крампном а Грабом.

Климківка не вытримала. Тепер проблемы з Ропом

Чорный сценарий стал ся фактом. В минулу пятницю 6. листопада/новембра Реґіональный Заряд Водной Господаркы в Кракові оголосил, што наполнiня воды в Климківці досягло уж критичного рівня. Польскы Воды ограничыли уж выпущаня воды, жебы затримати дальшу втрату запасів. Ситуация є результатом долготыраючой сушы і малого доплыву воды до резервуару. Низкій рівен воды може мати влияня на Ропу, з котрой вода бере ся для потреб жытелів Ґорлиц і околичных місцевости. В звязку з тым апелює ся до жытелів о ощадне хоснуваня воды. На загорозу звертат тіж увагу Польскій Союз Рыбакiв. Остерігают, же значуче ограничыня выпущаня воды може довести до осушыня части Ропы, а в результаті – до масового загыбаня рыб і інчых водных орґанізмів. Союз апелює уважно слідити ситуацию на ріці і звертати увагу на рыбы, котры можут остати в ізолюваных млаках або на осушеных одтинках рiкы. Зас появляют ся обіцянкы о плянах приготовліня ратунковых гыдролоґічных плянів і стратеґіі хоснуваня воды в кризовій ситуациі, хоц на тоту хвилю неє іщы ниякых конкретных інформаций.

Заповiды будучых подiй

В найблизшым часі заплянуваны сут дві подіі в Ґорлицях. 19. листопада/новембра о 17.00 год. в Рускій Бурсі одбуде ся стріча «Gorlicia Ruthenica. Слідами Лемків в довоєнных Ґорлицях», котру поведе Даміян Новак з Музею Бічской Землі. То нагода припомнути лемківску спільноту і iй місце в давных Ґорлицях. А на 28. листопада/новембра заплянувана є дебата до рапорту «Низкій Бескід – спільный краєвид». Сам рапорт є доступный на інтернетовій стороні Руской Бурсы.

Джерело знимкы: Beskid Niski