Сумар дня на 6. листопада/новембра 2026 р.

Приносиме вам сумар медияльной ґрупы ЛЕМ.фм+ на ден 6. листопада/новембра 2026 р.

400-річна ікона вернула по консервациі до ждыньской церкви

Забыткова ікона з XVII столітя по завершыню консерваторскых прац вернула до церви Покровы Пресвятой Богородиці в Ждыни. Інформувал о тым о. Ярослав Ґрич, парох православной парохіі в Ждыни. Ікона з ряду Деесіс єст датувана на около 1640 рік. Близко 4 столітя была свідком молитвы і духового жытя дальшых поколінь нашых предків. Проведены консерваторскы працы позволити усунути пізнійшы перемалюваня, привертаючы іконі єй історичну і артистичну вартіст. Перед парохійом іщы формальне завершыня задачы. По проведіню одобраня консерваторскых прац треба буде м.ін. фінально розрахувати ся з отриманой дотациі, з середків Міністерства Культуры і Нацийональной Спадковины. Фурт треба забезпечыти середкы на свій вклад в реализуваным проєкті. Парохія подякуваля вшыткым жертводавцям і звернула ся о дальшу підпору для охорону і консервациі забытків. Аж і найменша вплата помагат ратувати тоту спадковину для дальшых поколінь. Підпертя мож передавати посередництвом інтернетовой колекты на плятформі Pomagam.pl aбо безпосередньо на конто православной парохіі в Ждыни.

Одбыло ся 5. засіданя Рады Влады СР про нацийональны меншыны

В віторок 3. листопада/новембра в Братиславі одбыло ся 5. засіданя Рады Влады Словацкой Республикы про нацийональны меншыны. Засіданя вюл підпредседа Рады – полномічный влады СР про нацийональны меншыны Акош Горонь. Рада мала в проґрамі 13 пунктів. Бесідувано м.ін. о Фонді на підпору культуры нацийональных меншын, нацийональным высыланю в Словацкій Телевізиі і Радию, стані хоснуваня языків нацийональных меншын, а тіж о леґіслатівных процесах в обшыри прав нацийональных меншын. Рада голосувала і о засадне становиско в справі Позицийного документу, котрый мал бы забезпечыти партиципацию нацийональных меншын в вырішуваню о ділах, котры ся іх тыкают. Представникы державы не підпорили документу. Засадне становиско не было приняте. Дальше бесідувано і о ситуациі СНМ – Музею Русиньской Культуры в Пряшові – м.ін. о тым, як без фаховой діскусиі і дискусиі з русиньском меншыном было заплянуване перенесіня музею до маленькых просторів, загорожуючы фунґуваню музею і проданя сучасного будинку музею в Пряшові. І тым разом не повело ся приняти узнесіня, в котрым ішло лем о то, же члены Рады приняли інформацию о русиньскым музею. Так само не принято уснесіня, в котрым были рекомендациі про Словацку Владу в обшыри Головного узнесіня Федеральной Уніі Европейскых Народів, што апелює м.ін. до Европейской Уніі і технолоґічных фірм, жебы меншыновы языкы мали в рамках штучного інтелекту справедливу позицию. Во вшыткых припадках представникы центральных орґанів державной справы стримали ся од голосуваня, а за, окрем меншын, были лем полномічный і представителька ресорту шкільництва. Детальні о темах порушеных підчас засіданя прочытате в дописі на нашым портали.

ХІХ Стрічы Трьох Поколінь з Лемківском Культуром

Уж заран на Заході зачне ся дводньова подія – ХІХ Стрічы Трьох Поколінь з Лемківском Культуром, якы орґанізує пшемківскій Кружок Стоваришыня Лемків. Першый ден одбуде ся в Пшемкові – в просторах Пшемівского Осередка Культуры і Бібліотекы, початок о 16.00 год. В неділю подія перенесе ся до Любіна, до Центра Культуры Муза – початок так само о 16.00 год. В концертах выступит Лемківскій Ансамбль Пісні і Танця «Ластівочка» разом з запрошеныма гістми. Як інформувал Євген Габура, ведучый пшемківского Кружка СЛ – того рока будут зас несподіванкы – запрошены ансамблі придут першый раз выступити на тій подіі.