Сумар дня на 4. листопада/новембра 2026 р.

Приносиме вам сумар медияльной ґрупы ЛЕМ.фм+ на ден 4. листопада/новембра 2026 р.

«Реґіональна Пятка» на Крениця Форум

Представникы Пряшівского Краю і Малопольского Воєвідства в часі Крениця Форум 2026 запропонували створіня новой плятформы спілпрацы під назвом «Реґіональна Пятка». Ініциятива ма получыти пят реґіонів: два словацкы самоуряды, значыт Пряшівскій Край і Жыліньскій Край та три польскы воєвідства: малопольскє, шлезскє і підкарпатскє. Цілю є, жебы вести барже систематичну спілпрацу для розвитку приграничных теренів. О тій ідеі бесідували медже інчыма підпредседа Пряшівского Краю Штефан Бєляк, маршалок Малопольского Воєвідства Лукаш Смулка і віцемаршалок Вітольд Козловскій. Як підкрислил жупан Пряшівского Самосправного Краю Мілян Маєрскій, спільны діяня мают зосереджати ся медже інчыма на поліпшыню транспортовых получынь, збільшыню безпекы мешканців і ефективнійшій охороні водных засобів. Важныма обшырями спілпрацы мают быти тіж підпора молодых люди і розвиток сельскых теренів. Ідею «Реґіональной Пяткы» представлено в часі Крениця Форум 2026, якє одбило ся в днях 27.-28. жолтня/октобра і в котрым участ взяли представникы бізнесу, самоурядів, наукы і медий з Польщы і з заграниці.

Малярство артисты Підкарпатской Школы Малюваня буде презентуване в Ужгороді

В Закарпатскым Областным Артистичным Музею ім. Йосифа Бокшая в Ужгороді уж заран одбуде ся вернісаж выставы творів русиньского маляря Василя Свалявчыка, котра буде присвячена його недавному ювілейови – 75. річниці народин. Выстава пн. «Рідный край» презентувала буде головні пейзажы, котры од давна становлят основну тему творчости артисты. Як підкрисляют орґанізаторы, інспірацийом для його робіт незмінно остає родинна Підкарпатска Русь/Закарпатя. На експозициі найдут ся творы з ріжных періодів творчости, од найскорішйых, по роботы скінчены перед парома днями. Василь Свалявчык вродил ся в 1951 році в місцевости Зняцьово на Підкарпатю. Єст абсольвентом артистичной школы з Ужгороді і представником Підкарпатской Школы Малюваня. Был учеником такых єй представників як Микола і Едита Медвецкы, Антон Кашшай, Гавриіл Глюк, Іван Ілько ци Янош Шутєв. Артиста єст лавреатом престіжных нагорід і одзначынь. В 2002 році отримал званя Заслуженый Артиста Украіны, а в 2016 р. званя Народного Артисты Украіны. Його роботы презентуваны были м.ін. в Украіні, Німцьох ци в Польщы, находят ся в музейных і приватных колекциях.

В ґміні Санкова пройде спортовый вікенд

Любителі гірского біганя уж в найблизшый вікенд стрітят ся в ґміні Санкова. Єдна подія пройде в Радоцині, друга – на Маластівскій Маґурі. В суботу пройдут XI Ґорлицкы Гірскы Бігы, а участникы будут змагати ся на трасах в околици Радоцины. О ден місцьом змагань буде Маластівска Маґура. Пройде гын перша едиция змагань Vertical SkiPark Magura. Траса буде вела догоры лыжной стациі убочы Magura Ski Park. Беручы участ в змаганьях будут мусіти поконати 2300 метрів долгости і 340 метрів ріжниці высокости. Орґанізаторы просят до участи так спортовці, як і кібіців.