Сумар дня на 2. листопада/новембра 2026 р.

Приносиме вам сумар медияльной ґрупы ЛЕМ.фм+ на ден 2. листопада/новембра 2026 р.

«Комунікацийна доступніст ґорлицкого повіту – вызваня, потребы і перспективы реґіону»

В минулу пятницю в Повітовым Старостві в Ґорлицях одбыла ся конференция з назвом «Комунікацийна доступніст ґорлицкого повіту – вызваня, потребы і перспективы реґіону», посвячена єдному з найважнійшых проблемів, з якыма од років мірят ся реґіон. В подіі взяли участ представникы власти, самоурядів і єдиниц одповідальных за дорогову інфраструктуру в реґіоні. Стріча была нагодом, жебы представити найважнійшы комунікацийны вызваня повіту, омовити потребы жытелів і до дискусиі над розвязанями, котры бы могли зліпшыти транспортову доступніст реґіону. Бесідувано м.ін. о приверніню пасажерскых желізничных получынь до Ґорлиц, будові обводниці міста, розвитку публичного транспорту і модернізациі дорогово-мостовой інфраструктуры, тіж під оглядом войсковой мобільности. Староста ґорлицкого повіту Мирослав Вальонґ представил і даны образуючы скалю дороговых інвестиций плянуваных і реализуваных в сусідстві ґорлицкого повіту, што мало на ціли вказати нерівности в розвитку транспортовой інфраструктуры. Староста зверул тіж увагу на консеквенциі комунікацийного выключыня для штоденного жытя мешканців: ограничену мобільніст, тяжшый доступ до здравотной опікы, едукациі, рынку працы і новых можливости розвитку.

Просьба о підпору ремонту стріхы православной церкви в Щавным

Як інформувал парох православной парохіі Успіня Пресвятой Богородиці в Щавным о. Юлиян Феленчак, просят о підпору ремонту стріхы православной церкви в Щавным. Святыня єст цінным і красным сакральным забытком та важным свідоцтвом істориі, традициі і культурной дідовизны реґіону. Проведіня необхідных ремонтовых прац позволит заховати єй для вірных, многых одвиджаючых і будучых поколінь. Дрібниці што до колекты находят ся на фейсбуковым сайті парохіі Успіня Пресвятой Богородиці в Щавным.

Зложыли шлюбованя першы присяжены тлумачы кашебского языка

Історична хвиля для кашебского языка. Як подало Radio Kaszëbë, Дариюш Майковскій і Матеуш Клебба зложыли в Міністерстві Справедливости в Варшаві шлюбованя на присяженых тлумачів кашебского языка. То не лем символичне выріжніня, але і практична зміна. Завдякы отриманым управліням будут мочы рытувати урядово посвідчены тлумачыня документів на і з кашебского языка. Так о значыню той зміны бесідувал для Радия Ґданьск Матеуш Клебба: «Сут посеред нас такы, для котрых кашебскій язык єст фурт першым языком. Зато мы, як присяжены тлумачы, сме потрібны, жебы тоты особы могли на такых самых принципах корыстати з доступу до выміру справедливости».

ХІХ Стрічы Трьох Поколінь з Лемківском Культуром

Уж в тым тыжни, в днях 7.і 8. листопада/новембра одбудут ся ХІХ Стрічы Трьох Поколінь з Лемківском Культуром, якы орґанізує пшемківскій Кружок Стоварушыня Лемків. Того рока подія одбуде ся в першый ден в Пшемкові – в просторах Пшемівского Осередка Культуры і Бібліотекы (початок о 16.00 год.). В неділю подія перенесе ся до Любіна, до Центра Культуры Муза – початок так само о 16.00 год. В концертах выступит Лемківскій Ансамбль Пісні і Танця «Ластівочка» разом з запрошеныма гістми.