Сумар дня на 29. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 29. жолтня/октобра 2026 р.

Прошли ХХХІІ Стрічы з Лемківском Культуром в Ґожові Великопольскым

В мунулу неділю, 25. жолтня/октобра в Театрі ім. Юлиюша Остервы в Ґожові Великопольскым одбыли ся ХХХІІ Стрічы з Лемківском Культуром, зорґанізуваны тамтышнім Кружком Стоваришыня Лемків. Подію одкрыла трійка конферансиєрів: Ольга Ґаборек, Наталия Сивец і Андрий Пецух. В проґрамі запрезентували ся діти з ансамблю Лемко Тавер Юньор, Карпатія з Ярошівкы під ведіньом Андрия Перегрима, а пак по перерві ДаМир і польскій фольклористичный ансамбль Малы Ґожовякы, якій в своім репертуарі запрезентувал вязанку лемківскых танців. Выступила і солистка – акордеоністка – Йоанна Ґруша. Серед запрошеных гостів были представникы Рады Міста Ґожова. На конец Ваньо Ґаборек, ведучый Кружка СЛ в Ґожові, отримал подякуваня. Вчас подіі мож было придбати лемківскы выдавництва – книжкы, цедечка, в тым часопис «Бесіда» і «Лемківскій Річник».

«Русиньскы ідіомы, фразы і выразы»

В віторок 27. жолтня/октобра одбыла ся в просторах Інституту про Культуру Войводиньскых Русинів в Новым Саді презентация новой книжкы Ірины Гарді Ковачевич під назвом «Русиньскы ідіомы, фразы і выразы». На презентациі авторка бесідувала, же зберати ідіомы, фразеолоґізмы і выразы в русиньскым языку почала цілком спонтанно, спостерегла бо, же молодшы, але і старшы Русины часто замінюют слова з русиньской бесіды, найчастійше в іх припаді з сербскыма словами, але так само з анґлицкыма. Рецензентком выданя є Гелена Медєші, котра прочытала на презентациі рецензию. Присутных на промоциі привитала директорка Інституту про Культуру Войводиньскых Русинів Рената Вуясинович, і одповідня редакторка книгы Єлена Перкович. Книгу выдали Новинарска Асоцияция Русинів і Завод за Культуру Войводиньскых Русинів.

Влада Словациі схвалила актуализувану пропозицию Акчного пляну охороны прав нацийональных меншын

Влада Словацкой Республикы схвалила в середу 28. жолтня/октобра актуализувану пропозицою Акчного пляну охороны прав нацийональных меншын на рокы 2026-2030. Документ встановлює штырі стратеґічны і вісем операцийных цілів, з цілковитым чыслом 25 активности. Переважна част дотеперішніх активности остає захована в модифікуваній подобі і про слідуючый імплементацийный період. Тыма штырьома стратеґічныма цілями сут посильніня правного поставліня і свідомости о меншынах, розвиток інклюзивной і якістной освіты членів нацийональных меншын, хоснуваня реґіональных або меншыновых языків в практиці і медиях, як і системова підпора культуры та база знань. Полномічный влады про нацийональны меншыны Акош Горонь звернул увагу на то, же схваленый акчный плян творит стабільны рамкы про охорону і розвиток прав нацийональных меншын в слідуючых роках.

Митрополита Йона Максим заохачат до дбаня о середовиско

Пряшівскій архієпископ митрополита і голова Грекокатолцкой Церкви на Словациі Йона Максим звернул ся з еколоґічным апельом до вірных перед дньом Вшыткых Святых, котрый выстосувал посередництвом нетипового каналу – свого профілю в сіти социяльных медий. Митрополита заохочат, жебы зрезиґнувати зо штучных декораций на гробах близкых в місце натуральных, з чатины, зробленых самому. Як подає – стараня о гробы найблизшых можут іти в парі зо стараньом о натуральне середовиско, припоминат і, што найважнійшым выміром того часу єст памят за вмерлыма, молитва і запаліня світла.