Сумар дня на 28. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 28. жолтня/октобра 2026 р.

«Карпатскы стрічы» – о Контекстуальным словнику лемківского языка

29. жолтня/октобра о 19.00 год. одбуде ся десята в тым році онляйн бесiда з циклю «Карпатскы стрічы». Гостьом буде проф. Олена Дуць-Файфер з Ягайлоньского Університету, а бесіда буде посвячена двотомовій публикациі, «Контекстуальному словникови лемківского языка», выданому на початку 2026 рока.

Працы над словником тырвали 11 років. Є то перша того рода публикация на світі, перезначена так для Лемків, як і для осіб, котры ся вчат языка. Має служыти підпорі його жывотности і ревітализациі. Підчас стрічы проф. Олена Дуць-Файфер оповіст о роботі над словником і його значыню для лемківского языка. Стріча буде доступна на плятформі Zoom і в трансмісиі на каналі YouTube Карпатского Товариства. Запис стрічы буде пізнійше доступный на порталі karpaccy.pl.

Новосiльскiй уж в Білымстоку

В Білымстоку мож уж видіти выставу творчости Юрия Новосiльского – єдного з найцікавійшых малярів сучасности, котрый в своій роботі особливе місце посвячал сакральному малярству. Експозиция находит ся в сали Округовой Лікарской Палаты і представлят проєкты церкви, концепцийны ескізы іконостасів та архітектонічных деталів. Новосiльскій творил не лем сакральны проєкты, але тіж малювал олійны образы, пейзажы, акты і занимал ся сценоґрафійом. Його творчіст выріжнят особливый погляд на духовніст і естетику, а в сакральных роботах лучат ся містицизм, віра і особисте духове досвідчыня артисты. Выставу мож обзерати підчас кураторскых екскурсий 27. і 29. жолтня/октобра, а тіж 3. листопада/новембра, перед єй запертьом. Дрiбницi мож найти на сайті Округовой Лікарской Палаты в Білымстоку.

XIX Стрічы Трьох Поколінь з Лемківском Культуром

Стоваришыня Лемків просит на XIX Стрічы Трьох Поколінь з Лемківском Культуром, котры одбудут ся уж за пiлтора тыжня. То цикль подій, котры лучат ріжны ґенерациi через спільне пережываня лемківской музикы і традиций. В тым році подiя обнимат два дни. Першого дня видиме ся 7. листопада/новембра о 16.00 год. в Пшемкiвскым Осередку Культуры, а 8. листопада/новембра тіж о 16 год. в Центрі Культуры «Муза» в Любіні. На сцені выступит лемківскiй ансамбль Ластівочка з гістьми. Стрічы Трьох Поколінь сут нагодом до спільного святкуваня культуры Лемків, припоминаня своіх коренів і передаваня культуровой спадковины молодшым. Помагают підтримувати звязок з лемківском культуром і творити простір для єй дальшого розвитку. Орґанізатором є Стоваришыня Лемків. Дрiбницi мож найти на інтернетовій сторонi орґанізациі.

Палата в Заґужанах в руках Ґміны Ґорлиці