Сумар дня на 27. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 27. жолтня/октобра 2026 р.

Митрополита Йона Максим заохачат до дбаня о середовиско

Пряшівскій архієпископ митрополита і голова Грекокатолцкой Церкви на Словациі Йона Максим звернул ся з еколоґічным апельом до вірных перед дньом Вшыткых Святых, котрый выстосувал посередництвом нетипового каналу – свого профілю в сіти социяльных медий. Митрополита заохочат, жебы зрезиґнувати зо штучных декораций на гробах близкых в місце натуральных, з чатины, зробленых самому. Як подає – стараня о гробы найблизшых можут іти в парі зо стараньом о натуральне середовиско, припоминат і, што найважнійшым выміром того часу єст памят за вмерлыма, молитва і запаліня світла (2026-10-27-Jona-Maksym).

Карпатскій Науковый Перстін

Карпатскій Науковый Перстін злучыт учельні і бадачів реґіону. Ініциятиву заінавґурували підчас 2. Свята Карпат в Людзьмєжы. Єй цілю єст спілпраца академіцкых середовиск, інституций культуры і науковців для охороны і промоциі спадковины Карпат. Порозумліня покликуюче Карпатскій Науковый Перстін підписали в Інституті Нематерияльной Спадковины Карпатскых Народів в Людзьмєжы. Проєкт має уможнити спільны баданя, выміну досвідчыня і реализацию едукацийных діянь звязаных з культуром, історийом і карпатскыма традициями. Серед партнерів ініциятивы нашли ся м.ін. Академія Стосуваных Наук в Новым Санчы, Університет Іґнатянум в Кракові ци Прашвіскій Університет. Як підкрисляют орґанізаторы, богата спадковина Карпат може стати ся фундаментом модерных науковых проєктів і інновацийных розвязань, котры служат розвиткови реґіону. Карпатскій Науковый Перстін был єдным з найважнійшых пунктів проґраму тогорічного Свята Карпат, котре прошло в днях од 23. до 25. жолтня/октобра в Людзьмєжы. В подіі участ взяли представникы світя наукы, культуры і локальных спільнот карпатской обшыри.

Ґаля вручынь цертифікатів для найліпшый атракций підкарпатского воєвідства

Нагородили найліпшы туристичны атракциі підкарпатского воєвідства. Цертифікаты вручыли підчас ґалі, котра одбыла ся в Музею-Замку в Ланцуті. Выріжніня трафили до місц і осіб, якы промуют туристику і культурну спадковину реґіону. Найважнійшу нагороду, значыт Золотый Цертифікат для найлішпого туристичного продукту Підкарпатя, отримал Музей Народного Будівництва в Саноку. Як підркисляно підчас ґалі, выріжніня єст ефектом вельолітньой працы для промоциі реґіону і охороны уникальной деревяной архітектуры. Серед лавреатів нашли ся тіж Екомузей Деревяного Угля «На Выпалі» в Радошыцях та Музей Центрального Промыслового Округу в Сталовій Воли. Званя Туристичне Одкрытя Рока отримал Форт в Дуньковічках. То обєкт звязаный зо спадковином Твердині Перемышль. Бургомайстер Ярославя Марцін Назаревич отримал выріжніня «Серце оддане туристиці». Ґаля в Ланцуті была нагодом, жебы угонорувати особы і інституциі, котры причыняют ся до розвитку туристикы і будуваня атракцийного візерунку підкарпатского воєвідства.