Сумар дня на 5. листопада/новембра 2026 р.

Приносиме вам сумар медияльной ґрупы ЛЕМ.фм+ на ден 5. листопада/новембра 2026 р.

Уж в найблизшый вікенд ХІХ Стрічы Трьох Поколінь

Уж в суботу, 7. листопада/новембра зачне ся дводньова подія – ХІХ Стрічы Трьох Поколінь з Лемківском Культуром, якы орґанізує пшемківскій Кружок Стоваришыня Лемків. Першый ден одбуде ся в Пшемкові – в просторах Пшемівского Осередка Культуры і Бібліотекы, початок о 16.00 год. В неділю подія перенесе ся до Любіна, до Центра Культуры Муза – початок так само о 16.00 год. В концертах выступит Лемківскій Ансамбль Пісні і Танця «Ластівочка» разом з запрошеныма гістми. Як інформувал Євген Габура, ведучый пшемківского Кружка СЛ – того рока будут зас несподіванкы – запрошены ансамблі придут першый раз выступити на тій подіі, дотля ниякій з выступуючых ся не повторил.

Лемківскій язык на Медженародным Фестівали Штукы Оповіданя

Лемківскій буде присутный на 21. Медженародным Фестівали Штукы Оповіданя, якій одбуде ся в днях 18.-22. листопада/новембра в Варшаві. Присутніст нашого языка буде за справом Оксаны Грабан-Ліхтаньской, яка є лавреатком другой едициі Загальнопольского Конкурсу «Оповіст. Сила ріжнорідности», орґанізуваного Інститутом Языковой Ріжнорідности Польской Республикы. Як раз Оксана Грабан-Ліхтаньска отримала ex-aequo нагороду за своє оповіданя, якє запрезентувала по лемківскы. Окрем лемківской писательскы вчас «Ночы оповісти» запрезентує ся тіж Едита Козуб, яка створила оповіданя в польскым міґовым языку. Початок стрічы 21. листопада/новембра о 20.00 год. Вступне выносит 60 зл, мож придбати на вебсайті Мазовєцкого Інституту Культуры. Окрем того Оксану Грабан-Ліхтаньску буде мож почути вчас стрічы «Сила ріжнорідности 2026» 22. листопада/новембра медже год. 15.00 а 16.30.

В Любіні тырват подія «Лемкы в Центрі»

В Любіні тырварт фестіваль «Лемкы в Центрі». Вчера одбыла ся стріча зо свідком выселіня – Димитрийом Бочнєвичом, якій охочым оповідал о тым, што запамятал з выгнаня – акциі «Вісла» з 1947 рока. А уж заран, 6. листопада/новембра, на завершыня фестівалю, в сали Центра Творчых Дій в Любіні одбуде ся концерт ґрупы S.H.A., яка презентує і лемківскій репертуар. Орґанізатором фестівалю «Лемкы в Центрі» єст Центр Творчых Діянь в Любіні, а партнерами: Любіньскій Повіт, Православна Парохія Святой Тройці в Любіні і Фундация Kulturolubni. Задача дофінансувана з середків Музею Істориі Польщы в рамках проґраму Патріотизм Зарани.

В Ґорлицях будуют бункєр

В Ґорлицях тырват будова великого підземного охороного обєкту, котрый в разі небезпекы буде полныл функцию бункра, якій змістит тисяч осіб. Будова веде ся при Містецкым Комплексі Шкіл номер 6, під пляцом, котрый днес служыт за шкільне боіско. Обєкт буде мал масивну конструкцию, котра має хоронити перед фраґментами, обстрілом і падаючым ґрузом. В мирный час підземне приміщыня буде служыло як великій ґараж, а простір на верху надале буде могла быти хоснувана як боіско. На першый етап будовы місто Ґорлиці отримало понад 8 мілийонів злотых дофінансуваня.