Сумар дня на 19. марця 2021 р.

Приносиме вам сумар медияльной ґрупы ЛЕМ.фм+ на ден 19. марця 2021 р.

Од суботы новы ограничыня в цілій Польщы

Од заране в цілій Польщы будут обовязувати новы ограничыня спричынены коронавірусом. Як поінформували власти, епідемічна ситуация в державі ся погіршат. Причыном єст подля них нова бритийска мутация коронавіруса, яка одповідат уж за веце як 52% припадків заражынь. Найгірше, кєд іде о денне чысло хворых, ситуация выглядат в воєвідствах: мазовєцкым, шлезскым, малопольскым і великопольскым. Новы ограничыня, выголошены в минулу середу міністром здоровля Адамом Нєдзєльскым, мают обовязувати од суботы, 20. марця, до 9. квітня/апріля. Закрыты зас мают быти готелі, гандльовы центры (окрем м.ін. склепів з ідлом, аптык, дроґерий, книгарен, услуг), театры, музеі, ґалериі штукы, кіна, клюбы фітнесс ци силовні. Обєкты спортовы, лыжны стациі і басены будут мочы діяти лем в рамках професийного спорту або лем для членів державной кадры. Новы ограничыня тыкают тіж вчыня в школах. Вшыткы ученикы в державі, в тым клясы 1-3, будут ся вчыти на дистанс. Власти зарекомендували тіж переходити на працу онляйн, всяди, де єст то можливе.

Рапорт тыкаючый перспектив розвитку середніх міст

Польскій Економічный Інститут створил спис польскых міст середньой велькости, якым подля досліджынь Інституту пандемія коронавіруса дотля найменше зашкодила і котры в ґрупі досліджаных середніх міст мают перед собом найліпшы перспективы розвитку. Подля досліджынь Інституту малы і середні містны осередкы потерпіли в меншій ступени як великы. В 2019 році Польскій Економічный Інститут вюл досліджыня на 90 з 202 середніх міст в Польщы, в результаті котрых выріжнены были три ґрупы: (1) міста потрібуючы новых стратеґій і ідей на розвиток, (2) міста з потенциялом без сильных выріжняючых елементів і (3) локомотивы розвитку локальных рынків. Подля дослідників в найліпшій ситуациі і маюча перед собом найліпшы перспективы єст третя ґрупа. На початку того рока Інститут выдал новый рапорт тыкаючый досліджаной перше ґрупы міст. Подля него, міста з ґрупы «локомотивы розвитку локальных рынків» потерпіли з причыны пандеміі в меншій ступени як середні міста з дальшых двох ґруп. Так выходит з найважнійшых досліджаных індикаторів, якыма ся являют: фінансова ситуация міст, ситуация на локальным рынку працы і жытьова ситуация жытелів (тє. рівен жытя, материяльна і професийна ситуация, в тым безробітніст). Подля нового рапорту Інституту середні міста з ґрупы «локомотивы розвитку локальных рынків», мимо наслідств пандеміі, дале мают перед собом добры перспективы і аж 91% шанс реализациі найбарже оптимістичночо сценария розвитку. Серед 39 середніх міст зарахуваных Польскым Економічным Інститутом до ґрупы маючой найліпшы перспективы розвитку нашли ся напримір Ґорлиці, Новый Санч ци Ліґниця.

Дальшы роботы на одтинку дорогы Ропа-Высова

Зачал ся другій етап робіт на одтинку дорогы Ропа-Высова. Ремонт має на ціли поправити безпеку і комфорт ізды. Актуально тырват выміна перепустів перед тым, як дадут нову верству дорогы. Догваріня на реализацию перебудовы повітовой дорогы 1498К Ропа-Высова-Бліхнарка-Границя Державы было підписане під конец минулого рока. Кошт інвестициі то нецілы 4 мілийоны злотых. Близко 2 мілийоны передал на тоту ціль Фонд Самоурядовых Доріг. Плянуваный термін закінчыня робіт то май того рока.

Великодній Ярмак в Ґорлицях

Ґорлиці рыхтуют ся до орґанізациі Великоднього Ярмаку. Як повіл Лукаш Балаєвич, заступця бургомайстра Ґорлиц, вшытко тото, жебы помочы локальным підприємцям в особливо тяжкым для них часі пандеміі і звязаных з ньом ограничынь. Ярмак має быти нагодом для локальных продуцентів продати своі выробы і хоц кус поправити свойу фінансову ситуацию. Плянуваный термін подіі то 27. і 28. марця, кєд лем не являт ся новы ограничыня заказуючы того типу акций.