Сумар дня на 30. марця 2021 р.

Приносиме вам сумар медияльной ґрупы ЛЕМ.фм+ на ден 30. марця 2021 р.

Потягом з Ґорлиц до Крениці

Малопольска желізниця получыт Ґорлиці з Креницьом. Згідні з пляном в липци/юлию свою діяльніст зачне вакацийный вікендовый потяг з Ясла до Крениці через Ґорлиці. Буде то спільна атракция Малопольщы і Підкарпатя, котра прислужыт ся не лем туристам, але тіж жытелям обох воєвідств. Думка получыти ґорлицкій повіт з курортом явила ся якісый час тому, але як і многє чысло плянів была одложена через пандемію. О реактивацию ідеі особливо борол ся Адам Філяр, координатор кампаніі «kochamkolej.pl». В своім фейсбуковым вписі поділил ся добром новином і одраз подякувал самоурядовцям і парляментаристам та маршалкам малопольского воєвідства Вітольдови Козловскому і Лукашови Смулка за згоду і підпору ініциятивы. Тепер тырвают працы над можливым розкладом ізды, м.ін. думат ся над скомунікуваньом нового потягу з інчыма інтересуючыма леніями та над введіньом тзв. «Пакєту подорожника».

Три села з ґміны Крампна будут ся старати о дофінансуваня

Ґміна Крампна буде ся старала о дофінансуваня для проєктів для сел, де колиси находили ся державны підприємства рільничой господаркы (тзв. ПҐР-ы). Згідні з розпоряджыньом Рады Міністрів в справі підпоры ґмінных інвестиций в селах, де функцийонували ПҐР-ы, ґміны можут зложыти три внескы з мінімальном вартістю 50 тис. зл. На обшыри ґміны Крампна находят ся три села, де такы підприємства были: Ожынна, Котан і Вышоватка. В каждым з них проведено консультациі з жытелями і спільні рішено, з якыма інвестициями будут зложены внескы. Як поінформувал війт ґміны Крампна Казімєж Міськович, внескы тыкати ся будут перебудовы дорогы Граб-Ожынна, будовы санітарной канализациі та очыщальні в Вышоватці і перебудовы доріг Котан-Вересова Поляна і Котан-Колянин.

Опізніня при будові стежкы над Климківком

Будова пішо-роверовой стежкы над озером Климківка єднак ся продолжыт. Пляново працы мали ся закінчыти до кінця марця, єднак в часі веденых робіт явили ся проблемы. Як поінформувал Станіслав Кашык, віцестароста ґорлицкого повіту, треба наново запроєктувати малый одтинок 4-кілометровой трасы. При ярніх розтопах рівен воды в озері піднюс ся і забрал кавалец ґрунту, котрый находил ся на вызначеній трасі. З того взгляду одкрытя новой атракциі єст перенесене, правдоподібно до кінця квітня/апріля стежка буде оддана до хоснуваня. Вартіст інвестициі то 3,5 млн зл, з чого понад 2 млн то дотация з Реґіонального Операцийного Малопольского Воєвідства.

Наступны проблемы звязаны з будовом дорогы S3

Одкрытя дорогы S3 з Польковиц до Любіна опізнит ся. Пляново одтинок тот мал быти одданый до хоснуваня в другым кварталі того рока, але уж знатя, же так ся не стане. Новый плян передвидує, же трасом можна буде іздити аж в четвертым кварталі тр. Опізніня выникат м.ін. з конечности зміны выконавці, бо попередній не вывязал ся з вымогів умовы. Новый выконавця, окрем прац при будові нового одтинка, мусит поправити занедбаня за свойого попередника і попрятати місце будовы S3. Додатково, досліджыня вказали пошкоджыня в выконаню мостовых елементів, котры мусят быти направлены.

До Крениці вернули хворы на коронавіруса

В Креници зас діє тымчасовый шпыталь для хворых на коронавіруса. Як повіл для радия RDN директор креницкого шпыталя Славомир Кмак, в будинку находят ся уж пациєнты. Покля што в шпытали зрихтуваный єст першый модул, тзн. 28 постели. Неє гын респіраторів, зато приниманы будут лем хворы, котры вымагают госпітализациі, але лагідні переходят хвороту.