Сумар дня на 23. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 23. квітня/апріля 2021 р.

Зміна в пандемічных ограничынях

В минулу середу, 21. квітня/апріля, прошла конференция тыкаюча актуальной пандемічной ситуациі в Польщы і спричыненых ньом ограничынь. Як подал міністер здоровля Адам Нєдзєльскій, од 26. квітня/апріля зняты будут ограничыня тыкаючы діяльности бранжы бюті. Од понеділька фризиєрскы і косметичны салоны можут ся одкрыти во вшыткых воєвідствах окрем нижньошлезского, шлезского, лодзіньского, опольского і великопольского. Дальшы бранжы ограничены рестрикциями фурт остают закрыты.

З ґорлицкого повіту усунут азбест

В минулым році ґміна Мощениця як лідер пятьох самоуряділ в ґорлицкым повіті внескувала до самоуряду малопольского воєвідства о дофінансуваня задачы усунути з іх обшыри 600 тон азбесту. Як повіл для Радия Краків війт ґміны Мощениця Єжы Валенґа, тыкат ся то тіж елементів стріхы ци місц, де жытелі самы зняли і спризмували азбест. Ґміны Мощениця, Бобова, Санкова, Устя Ґорлицкє і Ропа отримают на тоту ціль 300 тис. злотых.

Мож внескувати о доплаты з Проґраму Розвитку Сельскых Обшыри

Ґорлицкій повіт припоминат, што до 17. мая тр. мож складати внескы о безпосередні і обшырьовы доплаты з Проґраму Розвитку Сельскых Обшыри. В тым році фармеры можут тото зробити лем в інтернетовій формі через аплікацию eWniosekPlus. Кєд дахто не може выполнити внеску сам, може тото зробити в повітовых бюрах Аґенциі Реструктуризациі і Модернізациі Рільництва. Одданя внеску по терміні, єднак не пізнійше як до 11. червця/юнія тр., буде мало результаты в процентовым зменшыню квоты платности. До 16. квітня/апріля е-внескы о доплаты зложыло близко 234 тис. фармерів. В минулым році о дофінансуваня старало ся іх понад 1,3 мілийона.

Уж неодолга пройдут ярні бігы Лемковина Ультра Трейль 

Як подали на фейсбуковым профіли Лемковина Ультра Трейль, тогорічны ярні бігы по Низкым Бескіді будут проходити од 15. до 16. мая. Подія з огляду на пандемію коронавіруса буде проходила в дакус зміненій формі. Примірно стартувати будут 4-особовы ґрупы в 30-секундовых одступах. Не буде тіж можливости ночувати в пунктах, ани не буде діяло центральне бюро в Коросні – бюра будут одкрыты в місті старту каждой з трас, тє. в Креници, Гыровій, Пулавах Выжніх і Івоничы. Додатковы записы на бігы, в рамках доступных лімітів, сут можливы іщы до кінця наступного понеділька, 26. квітня/апріля.