Спілведучы спільной комісиі бесідували о ситуациі нацийональных меншын

В віторок, 27. квітня/апріля, віцеміністер Блажей Побожый і Григорий Курпиянович, якы сут спілведучыма Спільной Комісиі Уряду та Нацийональных і Етнічных Меншын, стрітили ся в просторах Міністерства Внутрішніх Справ і Адміністрациі, жебы провести бесіду посвячену ситуациі нацийональных і етнічных меншын та хоснувателів кашебского реґіонального языка.

Дискусия тыкала задач звязаных з охороном і розвитком культуровой достоменности нацийональных і етнічных меншын.

В стрічы брала участ так само Марийоля Абкович, членкыня СКУтНіЕМ і репрезентантка караімской меншыны. Не было представників інчых меншын, в тым лемківской.

Участникы бесідували тіж про принципы даваня дотаций на задачы в 2022 р. Хоц каждого рока процедура стараня ся про ґранты є подібна, то головном болячком меншыновых орґанізаций єст все высокіст признаваных середків до того, кілько меншыны хотят достати, як тіж барз пізна реализация переказаня грошы до поєдных орґанізаций.

Лемківскы орґанізациі доднес не отримали признаных ґрантів на 2021 р., хоц ближыт ся конец четвертого місяця рока.

На стрічы підчеркнуло ся, што важном справом в квестиі достоменности, охороны меншын і іх розвитку єст орґанізация вчыня меншыновых языків, істориі і культуры. Спілведучы комісиі рішыли, што меншыновый освітовый систем буде пак дискутуваный на найблизшым засіданю СКУтНіЕМ.