Сумар дня на 5. мая 2021 р.

Приносиме вам сумар медияльной ґрупы ЛЕМ.фм+ на ден 5. мая 2021 р.

Молитовник по русиньскы

Пряшівскій грекокатолицкій архієпископ і митрополита Йоан Бабяк дал позволіня на друкуваня молитовника «Радуйте ся в Господі», в котрым находят ся тексты в русиньскым языку і з оддзеркаліньом по церковнославяньскы. Молитовник был готовый уж долгы рокы. Як повіл нашій редакциі отец Мілян Ясик з Общества святого Йоана Крестителя, котре зробило переклад церковных текстів до русиньского языка, молитовник буде обсягувал цілу Літургію св. Йоана Златоустого, тропарі і кондакы, парастас, панихіду, части утрені і вечырні, молитвы на рано, вечер ци на ріжны наміры, сповіднє дзеркало ци духовны пісні. Общество св. Йоана Крестителя так само зрыхтувало уж переклад до русиньского языка Нового Завіту. В минулу пятницю на 31. засіданю Рады Єрархів Грекокатолицкой Церкви на Словациі в рамках єдного з пунктів владикы схвалили комісию біблистів, котра сконтролює русиньскій текст тлумачыня. Єст надія, што Новый Завіт не буде чекал так долго на своє выданя як молитовник і Русины неодолга будут мочы чытати го в своім материньскым языку.

Повселюдне списуваня з асистентом

На Словациі од понеділька, 3. мая, зачал ся дальшый етап Повселюдного Списуваня Жытелів і Мешкань. По інтернетовым самосписуваню, вчас котрого списало ся 86% жытелів Словациі, пришол час на списуваня при помочы асистента. Є то задумане головно про сеньорів, люди без інтернету ци марґінализуваны ромскы ґрупы. Пункты асистуваного списуваня мусят забезпечыти кажде місто і село. Што важне – асистент не приде дохыж сам з себе. Кєд маме потребу, жебы то асистент пришол домів, треба по него наперед задзвонити і умовити ся на списуваня. Асистуване списуваня буде тырвало 6 тыжнів. 14% люди, котры ся іщы мусят списати, а сут то переважно сеньоры, то чысло, котре може іщы значучо влинути на результаты списуваня, бо як раз серед той віковой ґрупы є більше чысло представників нацийональных меншын як є словацкє середнє чысло.

Матура – час старт!

Писемным еґзаміном з польского языка зачали ся вчера в Польщы матуральны іспыты. Того рока матуристы мусят обовязково здавати лем три писемны еґзаміны на основным рівни: з польского языка, математикы і чужого языка. З причыны пандеміі не мусят обовязкого приступити до єдного писемного еґзаміну на розшыреным рівни. Є то можливіст для охочых. Охочы можут приступити до максимальні 6 такых еґзамінів. Матуристы не мусят тіж того рока здавати устных еґзамінів. Іспыты потырвают до 20. мая. Посліднього дня матурального маратону розписаны сут еґзаміны з языків нацийональных меншын, рано на основным рівни, пополудни на розшыреным. В тым шкільным році охоту здавати матуру з лемківского языка задеклярували дві особы.

В Польковицях зроблят веце

Додатковых 1,7 млн зл зовнішніх середків переведено до польковицкой касы. Грошы будут презначены м.ін. на ремонты в предшколях, выміну уличного освітліня на енерґоощадне ци дофінансуваня задачы тыкаючой профіляктикы надмірной вагы серед жытелів ґміны. На додаткову квоту в польковицкым буджеті складат ся близко піл мілийона злотых дофінансуваня з Европейского Фонду Реґіонального Розвитку та 1,2 млн зл як цільова дотация з урядовой касы.