Сумар дня на 6. мая 2021 р.

Приносиме вам сумар медияльной ґрупы ЛЕМ.фм+ на ден 6. мая 2021 р.

Упамятніня річниці Ґорлицкой Битвы

4. мая на воєнным цмонтери но. 91 в Ґорлицях, в місци, де є похороненых близко тисяч вояків з часів І світовой войны, одбыли ся невеликы упамятніня 106. річниці Ґорлицкой Битвы. З огляду на ограничыня тогорічны упамятніня были скромны. Під центральным крестом на цмонтери квітя зложыли м.ін. бургомайстер Ґорлиц Рафал Кукля ци ґорлицка староста Мария Ґубала. Ґорлицка Битва была єдном з важнійшых подій І світовой войны. В днях 2.-5. мая 1915 р. під Ґорлицями был перерваный росийскій фронт. По цілій Лемковині находят ся цмонтері з тамтого періоду, но на цмонтери но. 91 в Ґорлицях спочыват 425 австро-мадярскых вояків, 287 вояків росийской арміі та 140 німецкых вояків. Поінчы рокы одбывала ся в Санковій показова реконструкция битвы.

Нова роверова стежка в Старій Любовни

Місто Стара Любовня зачынат з будованьом роверовой трасы коло рікы Якубянка. Будуваня новой стежкы реализуване є завдякы фінансовій підпорі Пряшівского Самосправного Краю. Цілковитый кошт побудуваня трасы то 109,000 евро, при чым 30% є спілфінансуване містом Стара Любовня. Плянуваный час роботы то три місяці, а то значыт, же першы біциґлисты могли бы собі іхати трасом уж кінцьом того літа. Траса буде мала подля міста долгіст нецілых 514 метрів, а шырока буде на три метры. Має быти зроблене і освітліня цілой трасы. Кєд лем будут зняты ограничыня, вартат выбрати ся з Польщы до Старой Любовні і скорыстати з тамтышніх туристичных атракций.

Европейскій Біговый Фестіваль

В звязвку з рішыньом Заряду Малопольского Воєвідства в справі спілпрацы вчас Европейского Бігового Фестівалю в Креници, орґанізаторы фестівалю інформуют, што тогорічны змаганя одбывати ся будут одраз по Економічным Форумі – тє. в першый вікенд вересня/септембра 2021 р. (3.-5. вересня/септембра). Трасы змагань будут вести м.ін. через Креницку Яворину, Галю Лабівску, Лацкову ци Лан. Орґанізатором Европейского Бігового Фестівалю єст Фундация на Ратунок. Одраз заявлено, што скорше плянуваны змаганя «Tour de Zbój» будут перенесены на 4.-5. грудня/децембра 2021 р. Записы на Европейскій Біговый Фестіваль повинны зачати ся о пару дни.

В Кошыцях тестовали люди. Вельо з них перехворіло

В безплатным тестуваню на присутніст антиґенів коронавіруса в рамках клінічных студий Prevcoveast брало участ 9463 особы в Кошыцях, котры дотепер не отримали ани першой давкы вакцины проти захворіню COVID-19. Аж 25% жытелів Кошыц і близкой околиці мало выкрыты тыма тестами антиґены. З них аж 12% хворіло COVID-19 уж давнійше. Дальшы мали вытворены антиґены по хвороті протягом другой фалі пандеміі. 1% тестуваных жытелів Кошыц мал антиґены клясы ІґМ, што значыло, же ся в них правдоподібно актуально находит захворіня COVID-19.