Авторска стріча з бардом Лемковины. Петро Мурянка в Санчы

Уж заран, в пятницю, 18. червця/юнія 2021 р., пройде авторска стріча в Новым Санчы з єдным з найвыдатнійшых сучасных лемківскых поетів, писменників і соспільных діячів – Петром Мурянком.

На стрічу просит Сандецка Публична Бібліотека, яка хоче сандецкым сусідам приближыти творчіст і жытя Петра Трохановского, а при тым вказати на богату культуру Лемковины і єй жытелів.

Подія зачне ся о 17.00 год. Вчас ней, окрем літературной творчости, Петро Мурянка запрезентує і част своіх пісен, якы днес – по парох роках од іх выданя Стоваришыньом «Руска Бурса» в Ґорлицях – вписали ся до канону лемківской авторской творчости. Автор выступит зо своім сыном, Ігорьом Трохановскым.

Поетицкій вечер з Петром Мурянком єст орґанізуваный в рамках проєкту «Сандецкы Дни Літературы», якій єст дофінансуваный з середків Міністра Культуры, Нацийональной Спадковины і Спорту з Фонду Промоциі Культуры. Вступне на подію дармо. Більше деталів на сайті орґанізатора.

Петро Трохановскій

Петро Трохановскій (артистичный псевдонім Петро Мурянка) народил ся 10. серпня/авґуста 1947 р. в Пархові на Нижнім Шлеску, де переселены были його родиче в рамках акциі «Вісла» з рідного села Білцаревы.

Єден з найвыдатнійшых русиньскых поетів, писменників, співаків, культурный і соспільный активіста. Орґанізатор громадского жытя вельох поколінь Лемків. Ціле своє жытя занимат ся лемківскыма справами, вынятково стараючы ся на лемківскій язык, але і інчы обшыри русиньской культуры.

Єст єдным з думкодавців і реализаторів першых Лемківскых Ватр, закля імпреза была орґанізувана як патріотична, лемківска культурально-еманципацийна подія. Был долголітнім солистом леґендарного Репрезентацийного Ансамблю Лемків в Польщы – Лемковина. В 80. роках ХХ ст. влучыл ся в процес одроджыня лемківской соспільно-політичной діяльности. Єст єдным з основателів першой повыселенчой лемківской орґанізациі в Польщы – Стоваришыня Лемків. Основал єй пресовый орґан, часопис «Бесіда», котрый редаґує по днес.

Од початку реактивуваня в 1991 р. Стоваришыня «Руска Бурса» в Ґорлицях єст його активным членом. Як абсольвент Православной Духовной Семінариі, од 70. років ХХ ст. полнил ролю дяка, дириґента, церковного діяча такой на цілій Лемковині, обслугуючы не лем православну парафію в Креници (в своім часі і Ґорлиці), але, разом з веденым собом хором, вельо архіпастырскых Божескых Літургій вчас кєрмешів.

Автор збірок поезиі («Сухій бадиль», «Мурянчыско», «Як сокіл воду на камени», «Планетникы», «До Краю ненароджыня») та незрахуваной кількости дописів і публикаций на вшелеякы темы повязаны з лемківском культуром і історийом. Опрацувал буквар для діти «А Я знам азбуку» і антолоґію дітячой поезиі «Мамко, куп мі книжку», долгы рокы редаґувал «Лемківскій Річник» (перше «Лемківскій Календар»).

Тлумачыт на лемківскій язык творы світовой літературы. Выдал тіж першу част автобіоґрафіі в польскым языку «A Wisła dalej płynie». Довершыл вельолітнє діло, єдну зо своіх мрий, написал і печатал в 2017 р. моноґрафію рідного села пн. «Книга Білцаревы». Як учытель реліґіі і лемківского языка выховал пару поколінь Лемків. Єст неоціненым амбасадором лемківской нациі во світі.