«Слово» – 2-га неділя по Сошествії Святого Духа – неділя, 9.00 год.

Друга неділя по Сошествії Святого духа розповідать нам о покликаню першых учеників. Ісус Приходить ку Ґалілейскому морю і там увидів двох братів Петра і Андрія, а трохы далше Якова і Йоана.

Кличе їх, жебы ішли за Ним. Обіцять їм зробити з них рыбарів людей. Уловити рыбу, што то про ню значіло – нич лем істу смерть. Ісус їх позывать быти ловцями людьскых душ до сіті Божого Царьства.

В ґрецькім тексті є дословно хосноване – робити жывыма. Ловити до сіті Царьства значіло – з моря того світа, зо смерти ловити до жывота. Бо кедь ся чоловік находить в рабстві гріха, страсти, роскоші, привязаности ку тому земному, кедь чоловік жыє лем про тоту землю, тогды є зануреный в морі того світа і находить ся в духовній смерти. Выловити значіть дати жывот.

Ісус позывать апостолів, жебы ішли в Його імени ловити людьскы душы через крещіня ку жывоту. Але тото позваня ся не одностиь лем ку апостолам, єпіскопам ці священикам. То бы ся нам могло видіти, же тото слово не є про нас актуалне. То є лем про духовны особы. Але не є то правда.

Тото слово є актуалне про каждогґо хрістіана. Каждый є покликаный быти такым ловцьом до жывота. Кедь увіриме Хрістови, Його слову, кедь приймеме Його слово до нашого жывота, кедь Його жывот буде ся оддзеркадльовати на нашім жывоті, тогды там, де ся находиме, ці в родині, ці в школі, ці в роботі, можеме указовати дорогу, указовати світло іншым.

Тым самым їм указовати дорогу ку Хрістови а ловити з моря тоґо світа до сіті Божого Царьства. Слава Ісусу Хрісту!

В неділю, 4. юла 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 4. юла о 12.00 год. і 5. юла о 2.00 год. за русиньскым часом.