Вертат Обзерач Природы. Нова серия буде інча!

За нами уж зміна часу з літнього на зимовый. За выглядом золотит ся листя на деревах. Ранкы студены, а вечеры уж барз, барз долгы. То не сут знакы лем того, же ближыт ся зима, але тіж того, же вертат Обзерач Природы на антені Лем.фм! О чым буде бесіда в новій сериі?

Другу сотку одтинків зачнеме од великой революциі. Не підеме на нияку екскурсию, не одкрыєме ниякой новой закутины світа, не возму Вас на вандрівку бескідскым лісом. Нова серия буде інча як вшыткы дотеперішні. Призриме ся основам наукы, якой елементы фурт повтаряли ся при вельох нагодах – ци то в попередніх сериях Обзерача, ци аж і в Трьох Світах (тых веденых мном в середы і пятниці). Бесіда буде о ґеолоґіі.

Будте спокійны! Не вертаме до школы! В простый і цікавый спосіб постарам ся Вам приближыти основы наук о Земли. В першым одтинку дознате ся, чым ріжныт ся ґеолоґія од ґеодезиі, археолоґіі ци ґеоґрафіі і чом там часто (особливо в Польщы) мішаме тоты наукы. В дальшых одслонах Обзерача Природы помалы будеме одкрывати таємниці мінералів і скал. Познаме, як ґеолоґы ділят історию Землі на еры, епохы і періоды. І на вельо, вельо більше!

В тій сериі принимаме нову традицию – словник термінів! В каждій заповіди буде на кінци заміщеный спис науковых слів хоснуваных в одтинку так по лемківскы, як і по польскы. Готовы? То рушаме! А нову серию зачынаме в найблизшу пятницю 30. жолтня/октобра о 13.00 год. Проґрам буде повтаряный в суботу 31. жолтня/октобра о год. 7.30 та в середу 4. листопада/новембра о год. 4.30.

До стрічы на ґеолоґічным шляку!

geologia – ґеолоґія
geodezja – ґеодезия
górnictwo – гірництво
wypiętrzać się – піднимати ся
przemysł wydobywczy – добывчый промысель
surowce naturalne – природні / натуральны ресурсы

джерело знимкы: Wikimedia Commons, Wilson44691, Rochester Shale (Silurian, Wenlockian) exposed in the Niagara Gorge, New York