Сумар дня на 29. липця/юлия 2021 р.

Приносиме вам сумар медияльной ґрупы ЛЕМ.фм+ на ден 29. липця/юлия 2021 р.

Зливы над Лемковином

В віторок, 27. липця/юлия, над Лемковином зас перешли великы зливы. Тым разом потерліпа велика част лемківской обшыри ґорлицкого повіту. Найгірша ситуация была в Панкній, де вітер забрал дах з єдной з хыж. Окрем того поламаны были дерева, м.ін. на Маластівскій Маґурі. Перешла так само градівка. Місцевы пожарникы пару годин прібували усувати авариі. Зливы, підтопліня і небезпечна ситуация были так само в Вірхни, Ґладышові, Смереківци і Маластові.

Потерпіла і Пряшівщына

Пo вітірковых бурях потерліпи так само дакотры села в бардиівскым і старолюбовняньскым окресах на Словациі. Выголошена была третя ступін потопового алерту. Така ситуация была в селах Грабовец, Гажлин, Рыхвалд, Ґерлахів, Комарів і Шашова в окресі Бардиів, але і в місцевости Руска Воля над Попрадом (при лемківскым Лелюхові) в окресі Стара Любовня. Пожарникы допомагали по бурях і в містах Свидник і Бардиів. Власти і службы фурт моніторуют ситуацию в потоках. Набіжучо ліквідуваны сут шкоды по зливах.

Купуйте білеты на Лемківску Ватру

Припоминаме, што ближыт ся чергова Лемківска Ватра на Чужыні. Орґанізатор, Стоваришыня Лемків, заявлят, што чысло місц з огляду на пандемічны рестрикциі є ограничене і што білеты мож уж купувати в інтернетовій передпродажы згідні з принципом – хто першый, тот ліпшый. Доступный є тіж дрібницьовый проґрам подіі. Ціліст зачне ся в само полудне в суботу, 7. серпня/авґуста. По спортовій части зачнут ся концерты, якы переплітуваны будут інчыма акциями, як напр. зложыньом квітя під таблицями, якы упамятняют акцию «Вісла», ци переданьом Нагороды ім. Никыфора за 2021 рік. Кєд іде о музичну част, то на тогорічній листі выступуючых сут м.ін. ансамблі Ластівчата, Кычера, Древутня, Секция, Надія ци Гылля. Закінчыньом Ватры буде гулянка – забава при музиці ансамблю Вороны.

Папа на Словациі

В вересни/септембрі на Словацию приде папа Франциск. Каждый, хто буде хотіл брати участ в проґрамі і стрічы з папом в Кошыцях в рамках його поломництва, буде мусіл быти скорше зареґіструваный. Папа 14. вересня/септембра стрітит ся в Кошыцях з ромском меншыном на сідлиску Лунік IX, а дальше з молодежом на стадийоні Локомотивы. Як припомянул кошыцкій римокатолицкій архієпископ, Святый Отец си сам становил пріоритеты апостольской подорожы. Тоты темы розвиват і в своім понтифікаті. Подля римокатолицкого кошыцкого єпархы, є в повязаню з путьом папы до Кошыц важне похопити тото, же «хоче прити, жебы зміцнити віру в добро». Од 1. серпня/авґуста бы мала быти про участників його подорожы одкрыта реґістрация.