Сумар дня на 4. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 4. серпня/авґуста 2021 р.

Тепер лем од Яслиск до границі

Докінчыли дорогу медже русиньскым селом Чертіжне в окресі Меджелабірці і границьом Польщы. В будучности дорога має получыти Чертіжне зо селом Яслиска по польскій страні. Як подал шолтыс Чертіжного Петро Трічак, для розвитку туристикы в селі необхідным є, жебы выремонтували дорогу од Яслиск. Той до границі є лем 6,5 км. Ремонт дорогы по словацкій стороні коштувал близко 170 тис. евро. Фірма, котра го провела, зробила то скорше, як было законтрактуване.

Новосільскій в Тынци

В Музею Аббатства в Тынци тырват выстава «Артиста пророк. Іконы Юрия Новосільского». То нагода, жебы видіти рідко вказуваны творы артисты. Експозиция проходит з нагоды 10. річниці смерти артисты. Складат ся на ню сакральна творчіст Новосільского, яка походит з костелів і монастырів з Кракова і околиц. Як подає кураторка выставы Марта Штвєртня, векшіст презентуваных творів є наштоден недоступна для публикы, бо находит ся за монастырском кляузуром і обзерати іх можут лем монахы. В сумі в музею в Тынци вказуваных є 13 творів Новосільского.

Ручай і Дошна на закінчыня

В пятницю, 6. серпня/авґуста, при костелі свв. Филипа і Якова в Санковій пройде подія пн. «Ден і ніч в Санковій». Буде то підсумуваня трансграничного проєкту «Деревяна архітектура – памятниковы скарбы погранична», реализуваного в рамках Проґраму Трансграничной Спілпрацы Інтерреґ Польща-Словация 2014-2020. В проґрамі стрічы сут выступы ансамблю Ручай, Співочой Ґрупы Разом та Юлиі Дошны. На конец запрезентуваный буде фільм про культурово-природничу спадковину польско-словацкого погранича. Буде мож тіж покоштувати реґіональны стравы.

Европейскы Торгы Реґіональных Продуктів

В будучым тыжни, 11. серпня/авґуста, в Закопаным зачне ся ХІІ едиция Европейскых Торгів Реґіональных Продуктів. Торгы то предовшыткым нагода, жебы запрезентувати ремесельны выробы до ідла, але і артефакты розмаітого хосну ци косметикы. Додатково заплянувано варштаты з бібулкарства, тканя, малюваня на каменях ци робліня вітражів. Елементом Торгів буде тіж конкурс на Найліпшый Продукт до Ідла. В проґрамі сут тіж выступы реґіональных ансамблів. Европейскы Торгы Реґіональных Продуктів потырвают до суботы, 14. серпня/авґуста.

В Польковицях глядают рахмайстрів

Ґміна Польковиці оголосила додатковый набір кандидатів на списовых рахмайстрів. Зголошыня мож пересылати до 9. серпня/авґуста. До задач рахмайстра буде належало провести безпосереднє або телефонічне списуваня зо схоснуваньом мобільного ґратя выпосаженого в аплікацию з формулярьом. Кандидат мустит мати скінченых 18 років і найменше середню освіту. Припомнийме, што Нацийональне Повселюдне Списуваня Жытелів і Мешкань 2021 тырват до кінця вересня/септембра. Фурт мож іщы самому списати ся через сайт spis.gov.pl. В формулярі окрислят ся м.ін. свою нацийональніст, з листы мож выбрати тіж і лемківску нацийональніст і лемківскій язык, як тот хоснуваный в домашніх контактах. Рекомендуєме зазначати тоту можливіст!