Ювілей креницкой парохіі

Кінцьом липця/юлия 2021 р. креницка православна парохія св. Владиміра Великого одсяткувала два праздникы.

Окрем шторічного кєрмешу – свята покровителя церкви (28. липця/юлия), вірны той найдале высуненой на західній Лемковині православной церкви припоминали собі 40. річницю реактивациі парохіяльных структур. Ювілейны торжества проходили в 25. липця/юлия і зышли ся з пятом річницьом смерти бывшого єпархы перемышльско-новосандецкого, архієпископа Адама (Дубеца).

Молитва за минуле і будуче

Святкуваня очелил архієпископ Паісий, владыка перемышльско-ґорлицкой єпархіі. Вчас богослужынь были вознесены молитвы за покійного владыку Адама, помершых будівничых креницкого храму, але так само жертвы траґічных подій русиньского народу – Талергофу, Явожна і акциі Вісла. По літургіі, над гробницьом покійного архієпископа, яка находит ся в підземлях церкви, была одслужена панахіда.

Владыка Паісий спомянул, што православя на Лемковину принесли свв. Кірил і Методий і іх ученикы в ІХ ст. Першы істроричны інформациі о єдиній товды святыни в Креници – православній церкви – походят з 1547 р.

Єрарха бесідувал, што покора, віра і привязаня до культуры та традициі предків не дало счезнути, а завдякы ініциятиві митрополиты Василия, енерґіі товдышнього пароха о. Василия Ґалчыка і заанґажуваню прихожан, православя в Креници одродило ся сорок років тому.

Медалями св. Максима Ґорлицкого были одзначены місцевый дяк Петро Трохановскій та Анна Пеляк і Мелянія Клинковска. Владыка дякувал так само теперішньому настоятельови, о. Петрови Пупчыкови за труд довершыня будови церкви св. Владиміра.

Лемківска парохія

Православну парохію в Креници ериґувано 1. червця/юнія 1981 р. ріщыньом товдышнього митрополиты варшавского і цілой Польщы Василия.

Будова новой церкви зачала ся в 1983 р. Вюл єй о. Василь Ґалчык, а пак о. Петро Пупчык. В 2016 р. поставлено послідню – найвысшу баню з крестом, кінчучы тым офіцияльно будову. Храм свойом архітекторум навязує до традицийного лемківского стилю.

Долголітнім дириґентом церковного хору є Петро Трохановскій (Мурянка) – діяч, учытель, композитор, творця, редактор і єден з найвыдатнійшых сучасных лемківскых поетів. В креницкій церкви, як в єдній з невельох в Польщы, хоснуваны сут русиньскы переклады богослужебных книг о. Франтішка Крайняка. Од 90. років ХХ ст. деякы части богослужынь (Апостол, Євангелия) сут чытаны по лемківскы. Полный літопис находит ся на парохіяльным вебсайті.

В підземлях креницкой церкви спочал першый єпарха реактивуваной православной перемышльско-новосандецкой єпархіі, владыка Адам (1926 – 2016).