«Слово» – Праздник Успенія – неділя, 9.00 год.

Праздник Успенія або Заснутя Пресвятой Богородіці нам указує на послідні моменты перебываня Божой Матери на землі і переход до неба.

Як настав час єй одходу, апостолы, котры ся поросходили по цілім світі проповідати Євангеліє, были чудесным способом Божов силов перенесены, жебы были свідками переходу Марії з того світа до вічности.

Сам Господь наш приходить зо святыма ангелами, жебы взяти душу свойой любой Матери до неба. Яка радость наповнила сердце Марії, коли учула тоты солодкы слова свого Сына, коли увиділа його ласкаву тварь, коли Він взяв на свої рукы єй душу і переніс до вічной славы.

Она все повнила Божу волю. В каждій сітуації говорила Богу: Най ся діє твоя воля. Ай кедь много раз не розуміла. Але повиновала ся Божій волі. А тым указує про нас приклад.

Коли хочеме, жебы і наш переход в часі смерти быв радостный, блаженый маме і мы прияти тот проґрам – повнити Божу волю каждый день в каждій сітуації. Повиновати ся його волі, слухати і сохраняти його заповіді. Вірити його слову. Робити покаяня, кормити ся Тілом і Кровльов самого Бога. А тогды і наш переход буде радостный. І мы учуєме тоты радостны слова: Добрі, рабе добрый і вірный, подь до радости свойого Господа.

Просьме нашу небесну Матірь о щастливу годину нашой смерти. Слава Ісусу Хрісту!