Внет закрыют міст в Устю Рускым. Староство оголосило своє становиско

Як сме уж інформували в новинах нашого радия ЛЕМ.фм, од 6. вересня/септембра має ся зачати ремонт мосту в Устю Рускым, якій лучыт головный пут той місцевости од страны Квятони.

Сам міст буде неодолга закрытый для руху. Модернізация мосту выкликала вельо емоций серед жытелів ґміны. Было то спричынене інформацийом, што не буде зорґанізуваный переізд в близкій одлеглости од мосту, а лем обізды через дальшы села.

Одтяты од центру

Треба зазначыти, што не буде то будова нового мосту ци значуча модернізация, а лем забезпечыня мосту перед будівляном катастрофом, кєд же од долшого часу обєкт є в планным технічным стані.

Контроверсиі выкликали заповіди повітовых власти, што вчас ремонту, якій потырват коло місяця, не буде мож безпосередньо достати ся до Устя Руского од страны Кватони, а лем треба буде ходити далекыма обіздами. В такым положыню сут села на схід од Устя Руского, а то прим. Квятон, Смерековец, Ґладышів, Ждыня ци Конечна.

Перед парома днями на мості одбывали ся протесты жытелів і ґмінных власти. Апелювали они до повітовых урядників о тото, жебы конечно был зорґанізуваный даякій переізд в недалекій одлеглости од ремонтуваного мосту. Фактом є, што жытелі м.ін. Новиці, Квятони ци Смерековця, жебы достати ся до Устя, будут мусіти іти обіздом зо Шквіртного на Ганчову і пак аж на Устя.

Протестуючы своі постуляты арґументували тым, же кєд буде дака аварийна ситуация, як прим. конечніст доіханя медичной помочы ци пожарничой стражы, будут з тым проблемы, кєд же обізд заберат вельо часу. Окрем того, з початком вересня/септембра до устяньской школы повертают ученикы, якы так само доходят гын з інчых сел.

Не буде переізду

В одповіди на закликы жытелів, ґорлицкє староство оголосило комунікат, в котрым подало, што ниякій переізд коло мосту не буде зрыхтуваный. Неможніст побудувати переізд, хоц бы з камінных блоків, арґументувана є охороном середовиска і великыма коштами побудуваня переходу.

Заєдно подано, што буде побудувана лавка для пішого руху, так же буде мож доіхати автом до мосту од стороны Смереківця, пак лишыти авто і подати ся лавком на другій берег. Так само мают быти довожены ученикы до устяньской школы.

Автомобілі мают ходити обіздами. Легкы авта трасом Шымбарк – Білянка – Устя Рускє / Білянка – Лося – Ропа. Тягаровы авта зас підут трасом Ропа – Высова – Бліхнарка – границя / Ґладышів – Устя Рускє. Легкы поізды можут так само хоснувати пут зо Шквіртного через гору до Ганчовы і пак до Устя.

Ремонт має пляново потырвати коло місяця, но жытелі сут уж зрыхтуваны на тото, же – як найчастійше быват при роботах – вшытко ся годно выдолжыти.