Сумар дня на 6. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 6. вересня/септембра 2021 р.

Праздник в памят лемківского священномученика Максима Ґорлицкого

Днес в Ґорлицях проходит барз важный для православных вірных на Лемковині праздник в памят лемківского священномученика Максима Ґорлицкого. Святкуваня зачали ся Всеночном, служеном вчера о 18.00 год. в катедральній церкви св. Тройці в Ґорлицях. Праздникови традицийно уж товаришыло поломництво зорґанізуване Братством Православной Молодежы перемышльско – ґорлицкой єпархіі в предден свята. Днешні святочны богослужыня зачали ся уж о 6.00 год рано Божественном Літургійом. За офіцийным запрошыньом, якє опубликувала на своім фейсбуковым профіли православна парохія св. Тройці в Ґорлицях, на год. 8.30 заплянуваный єст акафист перед мощами св. Максима, на год 9.45 привитаня владык, а на 10.00 год. головна Літургія.

Новый резерват в русиньскым реґіоні на Словациі

В русиньскым реґіоні на Словациі выникне новый природничый резерват і охоронна зона. Великій Буковец і його охоронна зона выникнут рішыньом словацкых власти 15. вересня/септембра в сниньскым окресі, в катастральных териториях русиньскых сел Новоселиця, Рунина, Рускій Потік, Рускє, Тополя, Улич Кривый і Збой. Резерват буде ся находил на териториі близко 974 га. В рамках Великого Буківця будут вызначены дві зоны: в зоні А буде обовязувала найвысша, пята ступін охороны, а в зоні Б четверта. Третя ступін охороны буде обнимала охоронну зону о териториі понад 4986 га. Природничый резерват і охоронна зона будут частю світовой дідовизны UNESCO Стары буковы лісы і буковы пралісы Карпат і ічных реґіонів Европы. Окрем буковых лісів і пралісів Карпат будут там хоронены інчы сорты лісів, водны джерела ци жыючы там унікатны звірята.

Варштаты писаня ікон в любіньскій парохіі

Православна Парохія Святой Тройці в Любіні просит на варштаты писаня ікон. Будут они проходити в днях од 18. до 23. жолтня/октобра тр. в катехетичній сали парохіі в Любіні. Варштаты буде вюл іконописец Ваньо Григорук. Записы на варштаты будут одкрыты до неділі 10. жолтня/октобра тр. Охочы брати участ в варштатах прошены сут о майльовый або телефонічный контакт з парохійом. Чысло місц ограничене.

Празднуваня 30-літя реактивациі «Руской Бурсы» уж в тот четвер

Уж в тым тыжни, в четвер – 9. вересня/септембра, на ґорлицкым рынку пройде вынятковый концерт. Вынятковый зато, што буде то празднуваня 30. річниці реактивациі Стоваришыня «Руска Бурса» в Ґорлицях. В проґрамі подіі є выступ дітячой ґрупы Терочка та ансамблю ПУНА з Пряшова, єдиного в світі професийного ансамблю, якій занимат ся презентуваньом русиньского фольклору. Важным пунктом концерту буде вручыня посмертні признаного Богданови Ґамбальови, вельолітньому ведучому Руской Бурсы і єдному з ініцияторів реактивациі орґанізациі, Золотого Креста Заслугы – одзначыня признаване є президентом Польской Республикы. Концерт зачне ся о 16.00 год. Вступне дармо. В разі дощу концерт одбуде ся в Ґорлицкым Центрі Культуры. Сердечні просиме!